নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

বামুণীগাঁৱত ভিজিলেন্সৰ জালত বন বিষয়া

উৎকোচ লৈছিল ব্যৱসায়ীৰ পৰা

নিয়মীয়া বাৰ্তা ২৪ ডিচেম্বৰঃ বামুৃণীগাঁৱস্থিত পশ্চিম কামৰূপ বন সংমণ্ডলটোৰ লগতে বামুণীগাঁও বনাঞ্চলিক কার্যালয়ৰ চৌহদত সুৰক্ষা ৰেঞ্জাৰ হিচাপে কার্যনির্বাহ কৰি থকা লক্ষেশ্বৰ দাস নামৰ বন সুৰক্ষা বিষয়াজন অৱশেষত পৰিল ভিজিলেন্সৰ জালত৷ বিষয়াগৰাকীৰ বিৰুদ্ধে দুর্নীতিৰ অভিযোগ আছিল দীর্ঘদিনীয়া৷ আজি নিশা এজন ব্যৱসায়ীৰ পৰা এখন বালি গাডী মুকলি কৰি দিয়াৰ নামত ৬০ হাজাৰ টকা উৎকোচ হিচাপে লৈ থকাৰ সময়তেই হাতে–লোটে ধৰে ভিজিলেঞ্চৰ দলে৷ এইজন বন বিষয়াই হকে–বিহকে বালি কঢ়িওৱা গাডীৰ লগতে ঘৰুৱাভাৱে মাটি কঢ়িওৱা গাডী আদি ধৰি বহু পৰিমাণৰ ধন দাবী কৰি আদায় লৈ আহিছিল বুলি সঘনাই অভিযোগ হৈ আহিছে৷ তেওঁৰ এই অবাধ দুর্নীতি তথা অবৈধ ধন আদায়ৰ বিষয়ে বন বিভাগৰ উর্ধতম কর্তৃপক্ষৰ ওচৰতো অভিযোগ দিয়া হৈছিল ৷ অৱশেষত আজি উৎকোচ লৈ থকাৰ সময়তেই ভিজিলেঞ্চৰ হাতত ধৰা পৰে এইগৰাকী বিষয়া৷ প্রায় পোন্ধৰদিন পূবে মাটিয়াৰ এখন বালি কঢ়িওৱা ড্রাক জব্দ কৰিছিল এইগৰাকী বিষয়াই৷ বালিৰ গাডীখনৰ চালান থকাৰ পিছতো নানা অজুহাত দেখুৱাই বন বিষয়াগৰাকীয়ে গাডীখন জব্দ কৰিছিল৷ গাডীখন মুকলি কৰি দিয়াৰ বাবদ গাডীৰ মালিকৰ পৰা প্রায় এক লাখ টকা দাবী কৰিছিল যদিও গাডীৰ মালিকে ৬০ হাজাৰ টকা দিব বুলি কৈ তেওঁ এই বিষয়ে ভিজিলেঞ্চৰ লগত যোগাযোগ কৰিছিল৷ আজি গাডীৰ গৰাকীয়ে ৬০হাজাৰ টকা দি থকাৰ সময়তেই পূর্বে বামুণীগাঁৱৰ বন বিষয়াগৰাকীৰ কার্যালয়ৰ ওচৰত খাপপিটি ৰৈ থকা ভিজিলেঞ্চৰ দলটোৱে হাতে–লোটে ধৰে আৰু তেওঁক গ্রেপ্তাৰ কৰে৷ এই বাতৰি প্রেৰণ কৰাৰ সময়লৈকে বিষয়াগৰাকীক কার্যালয়তে আবদ্ধ কৰি ৰখা হৈছে৷ ইতিমধ্যে ঘটনাস্থলীত ছয়গাঁও থানাৰ ভাৰপ্রাপ্ত আৰক্ষী বিষয়া কপিল পাঠক উপস্থিত হৈছে৷

You might also like