নিয়মীয়া বাৰ্তা ২৫ ডিচেম্বৰঃ সদৌ অসম ছাত্র সন্থাই প্রদান কৰি অহা গোৱালপৰীয়া লোকগীতৰ সম্রাজ্ঞী, পদ্মশ্রী প্রতিমা বৰুৱা পাণ্ডে স্মাৰক বঁটা ২০২০ বর্ষৰ বাবে আগবঢ়োৱা হৈছে বিশিষ্ট নাট্যশিল্পী পৱিত্র ৰাভাক৷ ছাত্র সন্থাৰ সভাপতি দীপাংক কুমাৰ নাথ আৰু সাধাৰণ সম্পাদক শংকৰজ্যোতি বৰুৱাই আজি এই ঘোষণা কৰি কয় যে অহা ২৭ ডিচেম্বৰত শিল্পীগৰাকীৰ মৃত্যুৰ দিনটোত মহানগৰীৰ চানমাৰিৰ শ্বহীদ উদ্যানত থকা প্রতিমা বৰুৱা পাণ্ডেৰ প্রতিমূর্তিস্থলীত দিনৰ ১০.৩০ বজাত শিল্পীগৰাকীক এই বঁটা প্রদান কৰা হ’ব৷ ইফালে, ওদালগুৰি জিলাৰ টংলাৰ বিশিষ্ট শিল্পী, নাট্যকাৰ, অভিনেতা, পৰিচালক, সংগীত নাটক একাডেমী, বিছমিল্লা খান বঁটাপ্রাপক পৱিত্র ৰাভাৰ বঁটাপ্রাপ্তিৰ খবৰে সমগ্র জিলাখনৰ লগতে টংলাত আনন্দমুখৰ পৰিৱেশৰ সৃষ্টি কৰিছে৷ টংলাৰ ৰামচন্দ্র ৰাভা, নগেশ্বৰী ৰাভাৰ সু–সন্তান পৱিত্র ৰাভালৈ আজি সদৌ অসম ছাত্র সন্থাই বিশেষ সন্মান আগবঢ়োৱাৰ বাবে সদৌ অসম ছাত্র সন্থাৰ সহকাৰী সাধাৰণ সম্পাদক জয়ন্ত কুমাৰ ভট্টাচার্য, ওদালগুৰি জিলা ছাত্র সন্থা, ওদালগুৰি জিলা ৰাভা ছাত্র সন্থা, ওদালগুৰি জিলা ৰাভা সাহিত্য সভা, ওদালগুৰি জিলা সাহিত্য সভা, টংলা আঞ্চলিক ছাত্র সন্থা, আক্রাছু ওদালগুৰি জিলা সমিতি পশ্চিম, টংলা মিডিয়া চার্কোল, টংলা মিডিয়া ফ’ৰাম, ওদালগুৰি জিলা জাতীয়তাবাদী যুৱ–ছাত্র পৰিষদ, কৃষক মুক্তি সংগ্রাম সমিতি ওদালগুৰি জিলা, টংলা সাহিত্য সভা, শৰণীয়া কছাৰী ছাত্র সন্থা ওদালগুৰি জিলা সমিতি, ভূঞাখাত সাহিত্য সভা, আপকু ওদালগুৰি জিলা সমিতি, টংলা শিল্পী সমাজ, সাংস্কৃতিক মহাসভা ওদালগুৰি জিলা সমিতি, শিল্পী প্রফুল্ল কুমাৰ বৰুৱা, বাপন চন্দ্র শর্মা, পার্থপ্রতিম পাঠক, কমলেশ্বৰ ৰাভা আদিকে ধৰি বিভিন্ন শিল্পী, ৰাজনৈতিক মহল, বৌদ্ধিক সমাজে আদৰণি জনোৱাৰ উপৰি অভিনন্দন জ্ঞাপন কৰিছে৷