নিয়মীয়া বার্তা, ২৭ ডিচেম্বৰঃ তীর্থনগৰী হাজোৰ ঐতিহাসিক বিষ্ণুপুষ্কৰ পুখুৰী (মাধৱ পুখুৰী)ৰ ৪৪টাকৈ বিভিন্ন প্রজাতিৰ কাছ হাজো বন বিভাগৰ জৰিয়তে অসম ৰাজ্যিক চিৰিয়াখানা কর্তৃপক্ষক পঞ্চতীর্থ মন্দিৰ পৰিচালনা সমিতিয়ে প্রদান কৰে৷
উল্লেখ্য যে পুখুৰীটোৰ কাছ সংৰক্ষণৰ দায়িত্বত থকা প্রণৱ মালাকাৰে জনোৱা মতে, বিগত জুন–জুলাই মাহত সংৰক্ষণ কৰা বিভিন্ন প্রজাতিৰ কাছৰ কণীসমূহ বৈজ্ঞানিকভাৱে জগোৱা হৈছিল৷ এই কাছ পোৱালিসমূহ ছয় মাহৰ অন্তত কালি বন বিভাগৰ জৰিয়তে ৰাজ্যিক চিৰিয়াখানা কর্তৃপক্ষক প্রদান কৰে৷
ইয়াৰ ভিতৰত বৰমূৰীয়া কাছ ২৬টা, গংগা প্রজাতিৰ ১৪টা, নলডুৰা ২টা আৰু ফুটুকী হালধীয়া (বেঙা কাছ) প্রজাতিৰ ২টা কাছ চিৰিয়াখানা কর্তৃপক্ষক প্রদান কৰে৷ কাছ প্রদান কৰাৰ সময়ত দলৈ শিৱপ্রসাদ শর্মা, চিৰিয়াখানাৰ মুখ্য জন্তুপালক ৰজনীকান্ত ডেকা, হাজোৰ বন বিষয়া সংগীতা সিনহা, সমাজকর্মী ভৱ আঠপৰীয়া, উদ্ধৱ কলিতাৰ লগতে বনকর্মীসকল উপস্থিত থাকে৷