নিউজডেস্ক, ১৯ ডিচেম্বৰঃ ঘৰুৱা দল নর্থ ইষ্ট ইউনাইটেড এফ চিক পৰাস্ত কৰি ইণ্ডিয়ান ছুপাৰ লীগৰ পইণ্ট তালিকাৰ শীর্ষস্থানলৈ উন্নীত হ’ল বাংগালুৰু এফ চি ৷
বুধবাৰে গুৱাহাটীৰ সৰুসজাই ক্রীড়া প্রকল্পৰ ইন্দিৰা গান্ধী এথলেটিকছ ষ্টেডিয়ামত অনুষ্ঠিত মেচখনত বাংগালুৰুৱে নর্থ ইষ্ট ইউনাইটেডক ২–০ গ’লত পৰাস্ত কৰি পুনৰ জয়ৰ ছন্দলৈ উভতিছে ৷
নির্ধাৰিত সময়তকৈ ডেৰ ঘণ্টা পূর্বে আৰম্ভ হোৱা মেচখনত বাংগালুৰু দলে আৰম্ভণিৰ পৰাই গ’ল কৰাৰ চেষ্টা কৰে ৷ প্রথম ৪৫ মিনিটত ডিফেণ্ডিং চেম্পিয়ন দলটোৱে প্রত্যাশিত সফলতা লাভ নকৰিলে ৷
ইপিনে, দ্বিতীয়ার্ধত ঘৰুৱা দলটোৱে বল নিজৰ পক্ষত ৰখাৰ চেষ্টা কৰে যদিও বাংগালুৰুৱে আক্রমণৰ ধাৰা অব্যাহত ৰাখে ৷ ৬৮ মিনিটত আলহী দলটোৱে এক পেনাল্টী লাভ কৰে আৰু অধিনায়ক সুনীল ছেত্রীয়ে ইয়াক গ’ললৈ কার্যকৰী কৰি বাংগালুৰুক ১–০ত অগ্রগতি দিয়ে ৷ বাংগালুৰুৱে আক্রমণ তীব্র কৰি খেলৰ ৮১ মিনিটত এলবার্ট চাৰনৰ গ’লেৰে মেচত ২–০ৰ অগ্রগতি লয় আৰু মেচখনত বিজয় নিশ্চিত কৰি তোলে ৷
উল্লেখ্য যে বাংগালুৰুৰ বিৰুদ্ধে পূর্বে খেলা সাতখন মেচৰ এখনতহে জয় হৈছিল নর্থ ইষ্ট ইউনাইটেড ৷ কালিৰ মেচখনত বিজয় সাব্যস্ত কৰি বাংগালুৰুৱে ১৬ পইণ্টেৰে পইণ্ট তালিকাৰ শীর্ষস্থানলৈ উন্নীত হোৱাৰ বিপৰীতে ১০ পইণ্টেৰে পঞ্চম স্থানত থাকে নর্থ ইষ্ট ইউনাইটেড ৷