নিয়মীয়া বাৰ্তা ১৬ জানুৱাৰীঃ তিনিখন কৃষি আইন বাতিলৰ দাবীত প্রতিবাদ সাব্যস্ত কৰি থকা কৃষক সংগঠনৰ নেতৃবৃন্দৰ স’তে শুকুৰবাৰে কেন্দ্রীয় চৰকাৰৰ নৱমলানি আলোচনা কোনো ধৰণৰ সমাধান অবিহনে অন্ত পৰিছে৷ এই বৈঠকতো কোনো সিদ্ধান্তত উপনীত হ’ব নোৱাৰিলে কেন্দ্রীয় চৰকাৰ তথা কৃষক সংগঠনসমূহৰ নেতৃত্ব৷ অৱশ্যে পুনৰ ১৯ জানুৱাৰীত উভয় পক্ষই আলোচনাত বহিবলৈ সহমত পোষণ কৰিছে৷ কেন্দ্রীয় কৃষিমন্ত্রী নৰেন্দ্র সিং টোমৰে বৈঠকৰ অন্ত পৰাৰ পাছতেই সাংবাদিকৰ স’তে বার্তালাপত কয়– কৃষক নেতাসকলে আইন বাতিলৰ দাবীত অটল হৈ থাকে৷ আলোচনাৰ মাজেৰে সমস্যাৰ সমাধান পোৱা যাব বুলি অৱশ্যে আশা প্রকাশ কৰিছে মন্ত্রীগৰাকীয়ে৷ আগন্তুক আলোচনাৰ পূর্বে কৃষক নেতাসকলক এক অনানুষ্ঠানিক গোট গঠন কৰিবলৈও আহ্বান জনাইছে টোমৰে৷