নিয়মীয়া বাৰ্তা, ২০ ফেব্ৰুৱাৰীঃ ২২০ বছৰ পূর্বে ফৰাচী বিপ্লৱী বাহিনীৰ বিৰুদ্ধে যুদ্ধ কৰা ৮১জন ব্রিটিছ সৈনিকৰ মৃতদেহৰ অৱশিষ্ট নেদাৰলেণ্ডৰ এটা প্রাসাদৰ সমীপৰ খাৱৈৰ পৰা উদ্ধাৰ কৰা হৈছে৷ গৱেষকসকলে প্রকাশ কৰিছে এই তথ্য৷ ১৭৯২ৰ পৰা ১৯৯৭ চনলৈ ফৰাচী বিপ্লৱী বাহিনীৰ বিৰুদ্ধে যুদ্ধত এই সৈনিকসকলে প্রাণ হেৰুৱাইছিল৷ সৈনিকসকলৰ বয়স আছিল ১৫ৰ পৰা ৩০ বছৰ৷ প্রত্নতাত্ত্বিকসকলে পূর্বে এই গণকবৰক মধ্যযুগৰ যুদ্ধৰ গণকবৰ বুলি প্রথমে সন্দেহ কৰিছিল৷
কাৰণ মৃতদেহবোৰৰ অৱশিষ্টত ব্লেড আৰু অন্যান্য অস্ত্রৰ কটা চিহ্ণ স্পষ্ট হৈ আছে৷ কিন্তু শেহতীয়াকৈ কেইবাগৰাকীও বিশেষজ্ঞ প্রত্নতাত্ত্বিকে মৃতদেহবোৰৰ ওপৰত পৰীক্ষা চলাই এয়া ২২০ বছৰ পূর্বৰ যুদ্ধৰ ব্রিটিছ সৈনিকৰ মৃতদেহ বুলি নিশ্চিত কৰিছে৷ নেদাৰলেণ্ডৰ ভিয়ানেন চহৰৰ গণকবৰত এই মৃতদেহবোৰ উদ্ধাৰ হোৱাৰ পিছতে সেই সময়ত কোন ব্রিটিছ যোদ্ধাই ফৰাচী বিপ্লৱী বাহিনীৰ বিৰুদ্ধে যুদ্ধত অংশগ্রহণ কৰিছিল তাক লৈ এতিয়া চলিছে গৱেষণা৷