নিয়মীয়া বাৰ্তা, ৮ মাৰ্চ: আগন্তুক বিধানসভা নির্বাচনত ৰাজ্যৰ ৫টা সমষ্টিত প্রতিদ্বন্দ্বিতা কৰিব ইণ্ডিয়ান ইউনিয়ন মুছলিম লীগ (আই ইউ এম এল)–এ৷ গুৱাহাটীত এখন সংবাদ মেলত এই কথা সদৰী কৰে আই ইউ এম এলৰ ৰাষ্ট্রীয় সম্পাদক কৰিম আনিছ ওমৰে৷ গুৱাহাটীৰ ভেটাপাৰাস্থিত দলটোৰ কার্যালয়ত সংবাদ মেলত তেওঁ কয় যে আজি নিশাৰ ভাগতে তেওঁলোকে বৈঠক অনুষ্ঠিত কৰি প্রার্থী তালিকা প্রকাশ কৰিব৷ সংখ্যালঘু ভোটাৰক লক্ষ্য কৰি নির্বাচনী যুঁজত অৱতীর্ণ হোৱা দলটোৱে ৰাজ্যিক কমিটী গঠন কৰিছে বুলি তেওঁ সদৰী কৰে৷ সংবাদ মেলত ওমৰে কয় যে আগন্তুক বিধানসভা নির্বাচনত যাতে ধর্মনিৰপেক্ষ ভোটসমূহ বিভাজন নহয়, তাৰ বাবে তেওঁলোকে পদক্ষেপ ল’ব৷