নিয়মীয়া বাৰ্তা ১৩ মাৰ্চঃ অসম বিধানসভা নির্বাচনলৈ মাজত মাথোঁ কেইটামান দিন বাকী৷ ইয়াকে লৈ ৰাজ্যত চলিছে এতিয়া নির্বাচনী গৰম বতাহ৷ নির্বাচনী আচৰণবিধি বলৱৎ হোৱাৰ পিছতে সষ্টম হৈ পৰা আৰক্ষী, ফ্লায়িং স্কোৱাড, আবকাৰী আদিৰ দলে ভিন্ন প্রান্তত অভিযান অব্যাহত ৰাখিছে৷ এনে অভিযানৰ অংশ হিচাপে গড়চুক আৰক্ষীয়ে আজি তালাচী অভিযান চলাই ১২.৬৪ লাখ টকা জব্দ কৰে৷ গড়চুক থানাৰ আৰক্ষীৰ এটা দলে গড়চুক চাৰিআলিত অভিযান চলাই চঞ্চল চৌহান নামৰ এজন লোকৰ পৰা নগদ ৯ লাখ টকা জব্দ কৰে৷ ধৃত চৌহানে আৰক্ষীক ধনৰ উৎস দেখুৱাব পৰা নাই৷ আনহাতে, আহোম গাঁৱত আন এক অভিযান চলাই গড়চুক আৰক্ষীয়ে তীর্থপ্রতিম দাস নামৰ এজন যুৱকৰ পৰা নগদ ৩.৬৪ লাখ টকা জব্দ কৰে৷ এই যুৱকজনে ক’ৰ পৰা ধনখিনি আনিছে তথা ধনৰ উৎস দেখুৱাব পৰা নাই৷ গড়চুক আৰক্ষীয়ে ধনসহ দুয়োকে ফ্লায়িং স্কোৱাডক গতাই দিয়ে৷