নিয়মীয়া বাৰ্তা, ১৬ মাৰ্চঃ গুৱাহাটীস্থিত ‘নিয়মীয়া বার্তা’ৰ মুখ্য কার্যালয়ত সোমবাৰে বিয়লি বিশিষ্ট কণ্ঠশিল্পী সন্দীপ চমৰীয়াই ৰচনা কৰা আৰু সুৰ দিয়া ৰাজস্থানী আৰু অসমীয়া গীতৰ কেছেট ‘সুৰ সংগম–২’ উন্মোচন কৰা হয়৷ কেছেটটো উন্মোচন কৰে ‘নিয়মীয়া বার্তা’ কাকতৰ মুখ্য সম্পাদক তথা বিশিষ্ট কথাশিল্পী হোমেন বৰগোহাঞিয়ে৷ আৰম্ভণিতে উন্মোচক বৰগোহাঞিক গামোচা আৰু ৰাজস্থানী ছাফাৰে সম্বর্ধনা জনায় সন্দীপ চমৰীয়াই৷
কেছেটটো উন্মোচন কৰি তেওঁ কয়– ‘আজি মই এটা অভিনৱ কাম কৰিলোঁ৷ যোৱা বহু বছৰ ধৰি মই বহুত কিতাপ উন্মোচন কৰিছোঁ, বহুত গানৰ কেছেট উন্মোচন কৰিছোঁ, কিন্তু প্রথমবাৰৰ কাৰণে এজন মাৰোৱাৰী শিল্পীয়ে ৰচনা কৰা আৰু সুৰ দিয়া গানৰ এটা কেছেট উন্মোচন কৰিলোঁ৷ মাৰোৱাৰীসকলে অসমৰ শিক্ষা, স্বাস্থ্য, সমাজসেৱা আৰু সাহিত্য সেৱালৈ যথেষ্ট মূল্যৱান অৱদান আগবঢ়াইছে৷ বোধহয় প্রথমবাৰৰ কাৰণে এজন মাৰোৱাৰীয়ে নিজেই ৰচনা কৰা আৰু সুৰ কৰা এটা গানৰ কেছেট অসমীয়া ৰাইজলৈ আগবঢ়াইছে৷
গানটোৰ ৰচক আৰু গায়ক সন্দীপ চমৰীয়াই ‘সংগীতৰ যাত্রা’ৰ এটা অভিনৱ অনুষ্ঠান স্থাপন কৰিছে৷ যাৰ জৰিয়তে তেওঁ বহুতো অভিনৱ অসমীয়া গান অসমীয়া শ্রোতাসকলৰ মাজলৈ লৈ যোৱাৰ প্রয়াস কৰিছে৷ এই উদ্দেশ্য আগত ৰাখি তেওঁ প্রথমে লাচিত বৰফুকন আৰু জ্যোতিপ্রসাদ আগৰৱালাৰ জীৱনৰ কাহিনী অৱলম্বন কৰি কেইবাটাও নতুন গীত ৰচনা কৰিছে৷ কেছটটোত ৰাজস্থানী বিৰহ গীত, প্রেম গীত, ৰাজস্থানৰ মৰুভূমি আৰু বীৰ গাথাৰ ওপৰত আধাৰিত গীত, ফাগুন বিষয়ক গীত অন্তর্ভুক্ত হৈছে৷ অনুষ্ঠানত উপস্থিত থাকে ব্রহ্মপুত্র সাহিত্য সভাৰ সভাপতি কিশোৰ কুমাৰ জৈন, মাৰোৱাৰী হিন্দী পুস্তকালয়ৰ সভাপতি ৰবি অজিতসৰিয়া, ওদালগুৰিৰ ন্যায়িক দণ্ডাধীশ ৰঞ্জিতা আগৰৱালা আৰু সংগীত পৰিচালক অসীম নাথ৷