ইউপিপিএলৰ ৮ প্ৰাৰ্থীৰ নাম ঘোষণা 

নিয়মীয়া বাৰ্তা, ১৬ মাৰ্চঃ অহা ৬ এপ্ৰিলত অনুষ্ঠিতব্য অসম বিধান সভাৰ নিৰ্বাচনৰ তৃতীয় পৰ্যায়ৰ ভোট যুদ্ধত অৱতীৰ্ণ হ’বলগীয়া ইউনাইটেড পিপ’লছ পাৰ্টি লিবাৰেল চমুকৈ ইউপিপিএলৰ ৮ জন দলীয় প্ৰাৰ্থীৰ নাম আজি ঘোষণা কৰিছে।

দলৰ সাধাৰণ সম্পাদক মাউতি ব্ৰহ্ম হাজোৱাৰী স্বাক্ষৰিত এক প্ৰেছ বিজ্ঞপ্তিৰ জৰিয়তে তালিকাখন প্ৰকাশ কৰা হৈছে।

প্ৰকাশিত তালিকা অনুসৰি, সোমনাথ নাৰ্জাৰীক ২৮ নং গোসাঁইগাঁও বিধানসভা সমষ্টিত, মনোৰঞ্জন ব্ৰহ্মক ২৯ নং কোকৰাঝাৰ পশ্চিম (জনজাতি) সমষ্টিত, লৰেন্স ইছলাৰীক ৩০নং কোকৰাঝাৰ পূব (জনজাতি) সমষ্টিৰ পৰা প্ৰাৰ্থিত্ব প্ৰদান কৰা হৈছে।

আনফালে চিৰাং জিলাৰ দুই সমষ্টিত দুই প্ৰাক্তন এবছু নেতা ক্ৰমে জয়ন্ত কুমাৰ বসুমতাৰীক ৩১ নং চিদলী (জনজাতি) বিধানসভা সমষ্টিত আৰু ফণীন বড়োক ৩৩নং বিজনী বিধান সভা সমষ্টিত ইউপিপিএলৰ হৈ নিৰ্বাচনী প্ৰতিদ্বন্দ্বিতাত নমাইছে।

বিটিআৰৰ অন্তৰ্গত ৫৮নং তামুলপুৰ বিধানসভা সমষ্টিত লেহোৰাম বড়োক ৬২নং বৰমা (জনজাতি) বিধানসভা সমষ্টিত, ভূপেন বড়োক দলীয় প্ৰাৰ্থী হিচাপে প্ৰক্ষেপ কৰাৰ বিপৰীতে প্ৰাক্তন সাংসদ উৰ্খাও গৌৰা ব্ৰহ্মক (ইউ জি ব্ৰহ্ম) ৬৩ নং ছাপাগুৰি (জনজাতি) বিধানসভা সমষ্টিৰ দলীয় প্ৰাৰ্থী হিচাপে বিধানসভাৰ নিৰ্বাচনী যুঁজত অৱতীৰ্ণ হোৱাৰ সুযোগ প্ৰদান কৰিছে।