নিয়মীয়া বাৰ্তা, ১৯ মাৰ্চঃ গুৱাহাটীৰ ছয়মাইলৰ উৰণীয়া সেতুৰ তলত আৰ এল দাস কমপ্লেক্সত বৃহস্পতিবাৰে ‘মায়া বুটিক’ নামৰ এখন বুটিক মুকলি কৰা হয়৷ কণ্ঠশিল্পী প্রিয়ংকা ভৰালীয়ে এই বুটিকখন মুকলি কৰি কয়– ‘আগন্তুক ৰঙালী বিহুৰ সময়ত এই বুটিকখনে ক্রেতাৰ বিশেষ সমাদৰ লাভ কৰিব বুলি আশা কৰিলোঁ৷ এই বুটিকখনত অসমীয়া পৰম্পৰাগত সাজপাৰ বিশেষকৈ পাট, মুগাৰ কাপোৰ, বোৱা কাপোৰত সুন্দৰ ডিজাইন কৰা হৈছে৷ লগতে আ–লংকাৰো কাপোৰৰ ডিজাইন অনুসৰি ইয়াত ক্রেতাই লাভ কৰিব৷ সেইদৰে হাতে বোৱা গামোচাৰ লগতে পুৰুষ, শিশুৰ বাবেও সুন্দৰ ডিজাইনৰ কাপোৰ ইয়াত পোৱা যাব৷ মায়া বুটিকৰ সফলতা কামনা কৰিলোঁ৷’ আনহাতে সাংবাদিকে নির্বাচন সম্পর্কে সোধা প্রশ্ণৰ উত্তৰত শিল্পী প্রিয়ংকা ভৰালীয়ে কয়– ‘ভোটাধিকাৰ সাব্যস্ত কৰাটো সকলোৰে অধিকাৰ৷ বিগতবছৰটো নিৰাশাৰ মাজেৰে গ’ল৷ ভোট দিনো কি হ’ব বুলি কোৱা মই মানুহৰ পৰা শুনিবলৈ পাইছোঁ৷ কিন্তু সকলোৰে নিজৰ চিন্তা–ধাৰণা আছে৷ সেয়ে ৰাইজক বিবেক ভোট দিবলৈ মই আহ্বান জনালোঁ৷’ এই বুটিক মুকলি অনুষ্ঠানত বুটিকখনৰ অন্যতম স্বত্বাধিকাৰী মায়া গগৈয়ে কয়– ‘এইখন বুটিকত গ্রাহকে নিজৰ পছন্দ অনুসৰি বস্ত্র, অলংকাৰ ক্রয় কৰিব পৰিব৷ গুৱাহাটীত মায়াৰ তৃতীয়খন বুটিক মুকলি কৰা হ’ল৷ আগন্তুক ৰঙালী বিহুৰ সময়ত ইয়াত ১০ৰ পৰা ১৫ শতাংশ বিশেষ ৰেহাই গ্রাহকক দিয়া হ’ব৷’ মুকলি অনুষ্ঠানত বুটিকখনৰ আন এগৰাকী স্বত্বাধিকাৰী ৰাণু মহন্তৰ লগতে অন্যান্য কেইবাগৰাকী বিশিষ্ট ব্যক্তি উপস্থিত থাকে৷