মহানগৰীৰ পাণবজাৰৰ পার্কিঙত অসামাজিক কার্যকলাপ

নিয়মীয়া বার্তা, ২৯ ডিচেম্বৰঃ গুৱাহাটী মহানগৰ উন্নয়ন প্রাধিকাৰী (জিএমডিএ) কর্তৃপক্ষৰ অৱহেলাৰ বাবে পাণবজাৰস্থিত ফুডভিলাৰ তলত থকা কাৰ পার্কিং জহি–খহি যোৱাৰ উপক্রম ঘটিছে৷ জিএমডিএ কর্তৃপক্ষৰ চূড়ান্ত গাফিলতিৰ বাবেই আটকধুনীয়াকৈ নির্মাণ কৰা পাণবজাৰৰ কাৰ পার্কিং এতিয়া অসামাজিক কার্যকলাপৰ ঘাটিত পৰিণত হোৱাৰ গুৰুতৰ অভিযোগ উত্থাপন হৈছে৷ পাণবজাৰৰ জিএমডিএ পার্কিঙৰ পৰা মাত্র কেইমিটাৰমানৰ ব্যৱধানতে আছে কটন বিশ্ববিদ্যালয়, সন্দিকৈ কলেজ, নেহৰু পার্ক, উপায়ুক্তৰ কার্যালয়, কামৰূপ ন্যায়িক দণ্ডাধীশৰ আদালত, গুৱাহাটী উচ্চ ন্যায়ালয়কে ধৰি আৰু বহুকেইটা গুৰুত্বপূর্ণ চৰকাৰী–বেচৰকাৰী কার্যালয়৷ সদাব্যস্ত পাণবজাৰ অঞ্চলত থকা জিএমডিএৰ পার্কিঙত কাৰ–বাইক ৰখাই চৰকাৰী–বেচৰকাৰী কার্যালয়লৈ অহা–যোৱা কৰে লোকসকলে৷ পাণবজাৰৰ পার্কিঙৰ পৰা জিএমডিএ কর্তৃপক্ষই প্রতিমাহে এক লাখৰো অধিক টকাৰ কৰ সংগ্রহ কৰে৷ কিন্তু জিএমডিএৰ একাংশ অসাধু বিষয়া–কর্মচাৰীয়ে পাণবজাৰৰ পার্কিঙৰ পৰা সংগৃহীত ধন আত্মসাৎ কৰাৰ অভিযোগ উত্থাপন হৈছে৷

                                অভিযোগ অনুসৰি, কেইজনমান বিষয়া–কর্মচাৰীয়ে জিএমডিএৰ এজন কর্মচাৰীক পার্কিঙৰ ধন সংগ্রহৰ কামত নিয়োজিত কৰিছে৷ এই কর্মচাৰীজনে পার্কিঙৰ নামত প্রতিখন চাৰিচকীয়া বাহনৰ পৰা ২০ টকা আৰু দুচকীয়া বাহনৰ পৰা ১০ টকাকৈ সংগ্রহ কৰি আহিছে৷ প্রতিদিনে ৪ৰ পৰা ৫ হাজাৰ টকা এই পার্কিংটোৰ পৰা কর্মচাৰীজনে সংগ্রহ কৰে৷ কিন্তু এই সংগৃহীত ধনৰাশি নামমাত্রহে জিএমডিএ কর্তৃপক্ষই লাভ কৰি আহিছে৷ জিএমডিএ কর্তৃপক্ষৰ অৱহেলাৰ বাবে এতিয়া পাকিঙত একাংশ যুৱক–যুৱতীয়ে সুৰা সেৱন কৰাৰ লগতে বিভিন্ন অসামাজিক কার্যকলাপ সংঘটিত কৰি অহা বুলি একাংশ লোকে অভিযোগ কৰিছে৷ জিএমডিএ কর্তৃপক্ষৰ হেমাহিৰ বাবেই পার্কিটোৰ লোৰ ৰেলিং ভাগি যোৱাৰ লগতে পার্কিঙৰ ভিতৰত পানী জমা হৈ অস্বাস্থ্যকৰ পৰিৱেশৰ সৃষ্টি কৰিছে৷ পার্কিঙৰ নলাত সুৰাৰ বটল, চিপছৰ পেকেটকে ধৰি বিভিন্ন আৱর্জনা জমা হৈ থকাৰ ফলত বাৰিষাৰ সময়ছোৱাত পানীৰ মাজেৰে অহা–যোৱা কৰাৰ লগতে বাহনসমূহ পার্কিং কৰিবলগীয়া হয়৷ দীর্ঘদিন ধৰি এই পার্কিংটো মেৰামতি নকৰাৰ ফলত জহি–খহি যোৱাৰ উপক্রম ঘটিছে যদিও জিএমডিএ কর্তৃপক্ষই পার্কিংটো মেৰামতি কৰাৰ বাবে কোনো আঁচনি গ্রহণ কৰা নাই।