ক’ভিড প্রট’কলেৰে আৰম্ভ হ’ল বিধানসভাৰ পঞ্চদশ অধিৱেশন

নিয়মীয়া বাৰ্তা, ২২ মেঃ নৱনির্বাচিত ১২৪গৰাকী বিধায়কৰ শপতগ্রহণেৰে আৰম্ভ হ’ল পঞ্চদশ অসম বিধানসভাৰ অধিৱেশন৷ শুকুৰবাৰে প্রথম দিনটোতে প্র’টেম অধ্যক্ষ ফণীভূষণ চৌধুৰীয়ে আটাইকেইজন বিধায়কক গোপনীয়তাৰ শপত বাক্য পাঠ কৰোৱায়৷ মুখ্যমন্ত্রী ড০ হিমন্ত বিশ্ব শর্মাই প্রথমেই শপত লোৱাৰ পাছত প্রাক্তন মুখ্যমন্ত্রী সর্বানন্দ সোণোৱাল, প্রাক্তন অধ্যক্ষ হিতেন্দ্র নাথ গোস্বামী আৰু মন্ত্রী তথা ৰাজ্যিক বিজেপিৰ সভাপতি ৰঞ্জিত দাসে শপতগ্রহণ কৰে৷ পঞ্চদশ বিধানসভাত এইবাৰ ৪৪গৰাকী নতুন বিধায়কে শপত লয়৷ 

শুকুৰবাৰে বিধানসভাৰ শপতগ্রহণ অনুষ্ঠানত কেইবাগৰাকীও বিধায়কক দেখা পোৱা গ’ল পৰম্পৰাগত পোছাকত৷ বিহপুৰীয়াৰ বিধায়ক ড০ অমিয় কুমাৰ ভূঞাই সম্পূর্ণ পৰম্পৰাগত সাজত বিধানসভাত উপস্থিত হৈ সংস্কৃতত শপতগ্রহণ কৰে৷ একেদৰে সুৰেন ফুকনকো দেখা গ’ল পৰম্পৰাগত সাজত৷ নেপালী সম্প্রদায়ৰ বিধায়ক ৰূপে অহা গণেশ লিম্বুৱে পৰিধান কৰি আহিলে নেপালী পোছাক৷

শুকুৰবাৰে বিধানসভাত ১৪গৰাকী বিধায়কে বাংলা ভাষাত শপত লোৱাৰ বিপৰীতে ৮গৰাকীয়ে বড়ো ভাষাত, ৯গৰাকীয়ে সংস্কৃত ভাষাত, ৬গৰাকীয়ে ইংৰাজী ভাষাত, এগৰাকীয়ে নেপালী ভাষাত আৰু হিন্দী ভাষাত এগৰাকীয়ে শপত লয়৷

লক্ষণীয়ভাৱে সোণাই সমষ্টিৰ পৰা জয়লাভ কৰা এ আই ইউ ডি এফৰ বিধায়ক কৰিম উদ্দিন বৰভূঞাই সংস্কৃতত শপত বাক্য পাঠ কৰে৷ একেদৰে মুখ্যমন্ত্রীৰ ৰাজনৈতিক সচিব জয়ন্ত মল্ল বৰুৱা, বিধায়ক মানৱ ডেকা, ৰামকৃষ্ণ ঘোষ, জিতুমণি গোস্বামী, বিদ্যাছিং ইংলেং, সুমন হৰিপ্রিয়ায়ো সংস্কৃত ভাষাত  শপত লয়৷

আনহাতে দৰছিং ৰংহাং, গোবিন্দ বসুমতাৰী, লেহুৰাম বড়ো, মজিবুৰ ৰহমান, নন্দিতা গার্লোছা আৰু ৰূপছিং টেৰণে ইংৰাজী ভাষাত শপতগ্রহণ কৰে৷

লক্ষণীয়ভাৱে হিন্দী ভাষাত শপতগ্রহণ কৰে লক্ষীপুৰ সমষ্টিৰ বিজেপি বিধায়ক কৌশিক ৰয়ে৷ শপতগ্রহণ অনুষ্ঠানত অন্তিমজন বিধায়ক ৰূপে  শপত লয় নাহৰকটীয়াৰ বিধায়ক তৰংগ গগৈয়ে৷ পঞ্চদশ বিধানসভাত কনিষ্ঠতম বিধায়ক ৰূপে চেঙা সমষ্টিৰ এ আই ইউ ডি এফৰ বিধায়ক আশ্রাফুল হুছেইনে শপতগ্রহণ কৰে৷

ইফালে দিনৰ প্রায় ১১.২০ বজাত অসম বিধানসভাত প্রৱেশ কৰে ৰাইজৰ দলৰ সভাপতি অখিল গগৈয়ে৷ শপতগ্রহণৰ পাছতে অখিল গগৈয়ে বিধায়কসকলৰ আসনৰ ওচৰলৈ গৈ চা–চিনাকি হোৱাৰ লগতে বার্তালাপো কৰে৷ উল্লেখ্য যে কালিৰ অধিৱেশনত শপতগ্রহণৰ বাবে উপস্থিত নাথাকিল এ আই ইউ ডি এফৰ বিধায়ক চিৰাজুদ্দিন আজমল আৰু কংগ্রেছ বিধায়ক তথা প্রাক্তন মন্ত্রী বসন্ত দাস৷