নিয়মীয়া বাৰ্তা, ২৮ মে : দক্ষিণ কামৰূপৰ ছয়গাঁও আৰক্ষীৰ ড্ৰাগছৰ বিৰুদ্ধে মাৰাথন অভিযান অব্যাহত আছে ৷ এই অভিযানৰ মাজতে আজিও ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকৰ নেতৃত্বত গৰৈমাৰীৰ পুখুৰীপাৰ স্বাস্থ্য কেন্দ্ৰ চ’ক বজাৰত অভিযান চলাই বৃহৎ পৰিমাণৰ ড্ৰাগছসহ ধৰা পৰে দুজন কুখ্যাত ড্ৰাগছ ব্যৱসায়ী ৷ ধৃত ড্ৰাগছ ব্যৱসায়ী দুজন হৈছে গৰৈমাৰীৰ ৰজৱ আলী আৰু ৰফিকুল ইছলাম ৷
দুয়োজন ড্ৰাগছ ব্যৱসায়ীৰ পৰা উদ্ধাৰ হৈছে এখন স্কুটীৰ সৈতে নগদ ধন৷ ছয়গাঁও আৰক্ষীয়ে জব্দ কৰা স্কুটীখনৰ নম্বৰ হৈছে এ এছ ২৫ আৰ ৪০০৬ , নগদ ধন আৰু ড্ৰাগছ ব্যৱসায়ী দুজনৰ পৰা ২৫টা ড্ৰাগছ ভৰ্তি কন্টেইনাৰসহ হাতে লোটে ধৰা পেলায় ৷
উল্লেখ্য যে ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকে ছয়গাঁও আৰক্ষী থানাত ভাৰপ্ৰাপ্ত আৰক্ষী বিষয়া হিচাপে যোগদান কৰাৰে পৰা ড্ৰাগছৰ বিৰুদ্ধে অভিযান চলাই ইতিমধ্যে বহু লোকক আটক কৰি জেল হাজোতলৈ প্ৰেৰণ কৰাৰ লগতে ড্ৰাগছৰ বিৰুদ্ধে মাৰাথন অভিযান অব্যাহত ৰখাৰ বাবে সচেতন মহলে আৰক্ষী বিষয়া গৰাকীক ভূয়সী প্ৰশংসা কৰিছে ।