কংগ্রেছ কর্মীৰ ক্ষোভৰ উমান পায়েই নির্বাচনী পর্যালোচনা কৰা নাই নেতৃত্বইঃ প্রদেশ কংগ্রেছৰ মুখপাত্র দিলীপ শর্মা

এইবাৰ বিধানসভা নির্বাচনত বিজেপিক উৎখাতৰ বাবে কংগ্রেছৰ নেতৃত্বত মহাজোঁট গঠন কৰা হৈছিল৷ কংগ্রেছ নেতৃত্বাধীন এই মহাজোঁটত এআইইউডিএফ, বিপিএফ, চিপিআই, চিপিআই (এম), চিপিআই (এম এল), আঞ্চলিক গণ মর্চা, ৰাষ্ট্রীয় জনতা দল আদি চামিল হৈছিল৷ কিন্তু নির্বাচনী ফলাফলত দেখা গ’ল যে অসমৰ জনসাধাৰণে বিজেপি মিত্রজোঁটৰ সপক্ষে মতদান কৰিলে৷ জনসাধাৰণে মহাজোঁটক প্রত্যাখ্যান কৰাৰ কাৰণ কি বুলি ভাবে?
মহাজোঁটক প্রত্যাখ্যান কৰাৰ এটা প্রধান কাৰণ হৈছে এআইইউডিএফৰে কৰা মিত্রতা৷ এআইইউডিএফৰে মিত্রতা কৰাটো ডাঙৰ ভুল আছিল৷ দলৰ শৃংখলিত কর্মী হিচাপে আমি সেই মিত্রতা মানি লৈছিলোঁ যদিও সাধাৰণ ৰাইজে গ্রহণ নকৰিলে৷ এআইইউডিএফ দল যে এটা সাম্প্রদায়িক দল, মুছলমান সংখ্যাগৰিষ্ঠতা থকা কোনো এটা সমষ্টিতে এজনো হিন্দু লোকক প্রার্থিত্ব নিদিয়াটোতেই স্পষ্ট হৈছে৷ এই কথা মুকলিকৈ ক’বলৈ মই দ্বিধাবোধ নকৰোঁ যে দলীয় মঞ্চত কোনো আলোচনা নকৰাকৈ, তৃণমূল কর্মীৰ মতামত অবিহনে এআইইউডিএফৰে মিত্রতা কৰা হৈছিল৷ দ্বিতীয়তে, ‘কা’ক কংগ্রেছ আৰু মহাজোঁটে অন্যতম নির্বাচনী ইছ্যু কৰিছিল৷ কংগ্রেছৰ ৫টা গেৰাণ্টীত ‘কা’ সংযোজিত হৈছিল৷ কিন্তু সেয়া ব্রহ্মপুত্র উপত্যকাতহে প্রচাৰিত হ’ল৷ বৰাক উপত্যকাত কংগ্রেছে ‘কা’ক উহ্য ৰাখি আন চাৰিটা গেৰাণ্টী লৈ নির্বাচনত অৱতীর্ণ হয়৷ ফলত ৰাইজে কংগ্রেছক দুমুখীয়া বুলি ভাবিলে৷ তদুপৰি প্রার্থী বাছনি সম্পর্কীয় বহু কথা আছে৷ এক কথাত ক’ব লাগিলে কংগ্রেছ নেতৃত্বাধীন মহাজোঁটে বিজেপিৰ বিকল্প হিচাপে চৰকাৰ গঠন কৰিব পৰা শক্তি হিচাপে ৰাইজক পতিয়ন নিয়াব নোৱাৰিলে৷
 সদ্যসমাপ্ত বিধানসভা নির্বাচনত কংগ্রেছ দলে ৯৩খন আসনত প্রতিদ্বন্দ্বিতা কৰি মাত্র ২৯খন আসনতহে জয়লাভ কৰিলে৷ কংগ্রেছৰ এনে শোচনীয় বিপর্যয়ৰ কাৰণ কি বুলি ভাবে?
যোৱা পাঁচটা বছৰত কংগ্রেছে বিজেপিৰ বিৰুদ্ধে যুঁজখন শক্তিশালী কৰিব নোৱাৰিলে৷ বিজেপিৰ ব্যর্থতাসমূহ ৰাইজৰ মাজলৈ নিব নোৱাৰিলে৷ দলৰ নেতৃত্ব যোৱা চাৰিটা বছৰত আভ্যন্তৰীণ খেলিমেলি, লবী ৰাজনীতি, সভাপতি ভঙা–পতাৰ আভ্যন্তৰীণ ৰাজনীতিতে ব্যস্ত থাকিল৷ এই কথা যোৱা চাৰিটা বছৰত সংবাদ মাধ্যমত নিয়মিত ৰূপত প্রকাশ পাইছে৷ দলক সংঘবদ্ধ কৰি সঠিকভাৱে নেতৃত্ব দিয়াত সকলো নেতা ব্যর্থ হৈছে৷ ইয়াতকৈ ডাঙৰ কথাটো হৈছে– যিকোনো কাৰণতেই হওক, অসমীয়া মূলসুঁতিৰ মানুহ, জাতি–জনগোষ্ঠী, ভূমিপুত্রসকলক দলে আকর্ষিত কৰাত ব্যর্থ হ’ল৷
 ২০১৬ চনৰ বিধানসভা নির্বাচনত কংগ্রেছ পৰাজিত হোৱাৰ পিছত দলৰ তৰফৰ পৰা কোৱা হৈছিল যে এআইইউডিএফৰ বাবেই কংগ্রেছ বিপর্যস্ত হ’ল৷ এইবাৰ এআইইউডিএফৰে কংগ্রেছে মিত্রতা কৰাৰ পিছতো আশানুৰূপ ফলাফল প্রদর্শন কৰিব নোৱাৰাৰ কাৰণ কি বুলি ভাবে?
আমি ইতিমধ্যে কৈছোঁৱেই– অসমৰ সকলোৱে এআইইউডিএফৰে কংগ্রেছৰ মিত্রতাৰ বিৰোধিতা কৰিছে৷ দলৰ একাংশ নেতাই একমাত্র নিজৰ আসনখনৰ স্বার্থত এআইইউডিএফৰে মিত্রতা কৰিছে৷ ২০১৯ চনৰ লোকসভা নির্বাচনৰ প্রাক্ক্ষণত প্রদেশ কংগ্রেছৰ কার্যনির্বাহক বৈঠকে এআইইউডিএফ দলক সাম্প্রদায়িক আখ্যা দি কোনো কাৰণতে সেই দলৰে মিত্রতা নকৰাৰ সিদ্ধান্ত লৈছিল৷ সেই সিদ্ধান্ত এতিয়াও বাহাল আছে৷ পৰৱর্তী পর্যায়ৰ প্রদেশ কংগ্রেছৰ কোনো কার্যনির্বাহক বৈঠকে সেই সিদ্ধান্ত প্রত্যাহাৰ কৰা নাই৷ দলীয় কর্মীক সম্পূর্ণ অন্ধকাৰত ৰাখিয়েই এআইইউডিএফৰে মিত্রতা কৰিলে৷ এআইইউডিএফৰ লগত মিত্রতা কৰাৰ বাবেই উজনি অসম, উত্তৰ অসমেই নহয়, নামনি অসমতো মূলসুঁতিৰ মানুহে কংগ্রেছক গ্রহণ নকৰিলে৷
এইবাৰ বিধানসভা নির্বাচনত আপুনি হাজো সমষ্টিৰ কংগ্রেছৰ সবল প্রার্থিত্বৰ দাবীদাৰ আছিল৷ কিন্তু শেষ মুহূর্তত আপুনি দলীয় টিকট নাপালে৷ এই সম্পর্কত আপুনি কি কয়?
ঃ প্রায় ১৩–১৪ বছৰ ধৰি আমি দলত সেৱা আগবঢ়াই আহিছোঁ৷ এসময়ত জিলা পৰিষদৰ সদস্য হিচাপেও সেৱা আগবঢ়াইছোঁ৷ প্রদেশ কংগ্রেছৰ মুখপাত্র হিচাপে কি কৰিছোঁ, সেয়া সংবাদ মাধ্যমে দেখিছে৷ আজিৰ পৰা দুবছৰ পূর্বে দলৰ হৈ যেতিয়া কথা কোৱা মানুহৰ অভাৱ হৈছিল, তেতিয়াও দলৰ হৈ আগবাঢ়ি আহিছিলোঁ৷ হাজো সমষ্টিটো এইবাৰ কংগ্রেছৰ সম্ভাৱনাময় সমষ্টি আছিল৷ কি কাৰণত আমাক টিকটৰ পৰা বঞ্চিত কৰিলে বুজি নাপালোঁ৷ হয়তো কাৰোবাক ৱাকভাৰ দিবলৈ আৰু কাৰোবাক হৰুৱাবলৈকে আমাক টিকটৰ পৰা বঞ্চিত কৰিলে৷ তৎসত্ত্বেও মই দলৰ স্বার্থতে হাজোৰ দলীয় প্রার্থীগৰাকীৰ হৈ দিনে–নিশাই প্রচাৰ অভিযানত জড়িত হৈছিলোঁ৷
 এইবাৰ কংগ্রেছৰ দলীয় টিকট প্রদানত ব্যাপক দুর্নীতি–নিয়ম সংঘটিত হোৱাৰ গুৰুতৰ অভিযোগ উঠিছে৷ এই সংক্রান্তত আপোনাৰ ভিডি’ এটাও ভাইৰেল হৈছে৷ সেই ভিডি’টোত আপুনি বহু সমষ্টিত ধনৰ বিনিময়ত দলৰ নেতৃত্বই টিকট দিয়াৰ লগতে বহু ক্ষেত্রত বিজেপিৰে গোপন বুজাবুজিৰো অভিযোগ কৰিছে৷ কি পৰিস্থিতিত আপুনি তেনেধৰণৰ বিষয় এটা ৰাজহুৱা কৰিলে?
আপুনি যিটো ভিডি’ৰ প্রসংগ উত্থাপন কৰিছে, সেই ভিডি’টো আমাৰেই হয়, সেয়া সত্য৷ প্রদেশ কংগ্রেছৰ দুটা হোৱাটছএপ গ্রুপত দলীয় শৃংখলা মানি দলৰ পৰাজয়ৰ কাৰণসমূহ ফঁহিয়াই কৰা বক্তব্যৰ ভিডি’ আপলোড কৰিছিলোঁ৷ দলীয় মঞ্চত উত্থাপন কৰা সেই ভিডি’টো পৰৱর্তী পর্যায়ত কোনোবাই বাহিৰত উলিয়াই দিলে৷ যাৰ ফলত ভিডি’টো প্রচাৰ মাধ্যমেও পালে৷ ভিডি’টোত আমি বিভিন্নজনৰ অভিযোগৰ ভিত্তিতেই কিছু কিছু সমষ্টিত ধনৰ বিনিময়ত আৰু কিছু সমষ্টিত বিজেপিৰ লগত গোপন বুজাবুজি কৰি টিকট দিয়াৰ অভিযোগ কৰিছিলোঁ৷ কাৰণ এইবাৰ নির্বাচনত টিকট দিয়াৰ ক্ষেত্রত দলীয় নেতৃত্বই ৩–৪টা ছার্ভেৰ ৰিপ’টৰ ভিত্তিতহে দলীয় প্রার্থিত্ব দিয়াৰ কথা হৈছিল৷ কিন্তু শেষ মুহূর্তত কিছু সমষ্টিত এনে প্রার্থী দিয়া হ’ল যে বিভিন্নজনে সন্দেহ–ভিযোগ কৰিবলৈ বাধ্য হ’ল– হয়, টকাৰ বিনিময়ত অথবা বিজেপিৰে হোৱা গোপন বুজাবুজিৰ ভিত্তিতে তেওঁলোকক টিকট দিয়া হৈছে৷ তেনে বহু অভিযোগৰ আধাৰতে আমি ভিডি’টোত সেই অভিযোগ উত্থাপন কৰিছিলোঁ৷
নির্বাচনী ফলাফল প্রকাশৰ এমাহ পাৰ হৈ গ’ল৷ কিন্তু আজিলৈকে নির্বাচনী ফলাফল সম্পর্কত কংগ্রেছে পর্যালোচনা বৈঠক অনুষ্ঠিত কৰা পৰিলক্ষিত হোৱা নাই৷ ক’ভিড পৰিস্থিতিৰ বাবে বৈঠক অনুষ্ঠিত কৰিব নোৱাৰিলেও ভার্চুৱেল বৈঠক পাতি পর্যালোচনা কৰাৰ অৱকাশ আছিল৷ এই সংক্রান্তত আপুনি কি কয়?
এইটোত আমিও আচৰিত হৈছোঁ৷ প্রদেশ কংগ্রেছৰ বিষয়ববীয়া, জিলা কংগ্রেছৰ সভাপতি, নির্বাচনৰ প্রার্থীসকলৰ সৈতে ভার্চুৱেল বৈঠক অনুষ্ঠিত কৰি নির্বাচনী পর্যালোচনা কৰিব পাৰিলেহেঁতেন৷ কিয় নাই কৰা, প্রদেশ কংগ্রেছৰ কর্তৃত্বশীল নেতৃত্বই ক’ব পাৰিব৷ হয়তো এনেও হ’ব পাৰে যে দলীয় কর্মীৰ ক্ষোভৰ উমান পায়েই পৰিস্থিতিৰ মুখামুখি হোৱাৰ পৰা আঁতৰি থাকিবলৈকে সদ্যহতে বৈঠক অনুষ্ঠিত কৰাৰ পৰা বিৰত আছে৷ কাৰণ, নেতৃত্বৰ কিছুমান ভুল সিদ্ধান্তই দলক এইবাৰ শাসনলৈ অহাত বাধা দিলে৷ ইয়াৰে কিছুমান ভুল আছিল ইচ্ছাকৃত৷ এই ক্ষেত্রত আমি এজন ব্যক্তিৰ কথা কোৱা নাই৷ নির্বাচনটোত যিসকল ব্যক্তি সন্মুখৰ শাৰীত আছিল, তেওঁলোকৰ কথাকেই কৈছোঁ৷
 অসমত কংগ্রেছৰ ভৱিষ্যৎ সম্পর্কত আপোনাৰ দৃষ্টিভংগী কি?
দলক সু–সংগঠিত কৰিবলৈ ওপৰৰ পৰা তললৈ, তলৰ পৰা ওপৰলৈ নিজৰ স্বার্থ ত্যাগ কৰি, ঐক্যবদ্ধভাৱে, কোনো লবী নকৰাকৈ কাম কৰিলে দলৰ অৱস্থা ভাল হ’ব৷ কংগ্রেছৰ আদর্শ গ্রহণযোগ্য আদর্শ৷ ৰাইজে সেই আদর্শ ৰূপায়ণ কৰিব পৰা সঠিক নেতৃত্ব বিচাৰে৷ তেতিয়াহে কংগ্রেছৰ ভৱিষ্যৎ উজ্জ্বল হ’ব৷
 মুখ্যমন্ত্রী ড০ হিমন্ত বিশ্ব শর্মা নেতৃত্বাধীন বর্তমানৰ নতুন চৰকাৰখনৰ পৰা আপোনাৰ প্রত্যাশা কি?
ঃ নতুন চৰকাৰখনে ৰাজ্যৰ আর্থ–সামাজিক সকলো দিশ সামৰি উদ্ভাৱনীমূলক আইডিয়া লৈ কাম কৰক৷ মুখ্যমন্ত্রী ড০ হিমন্ত বিশ্ব শর্মা যথেষ্ট সক্রিয় আৰু দিক্দর্শী–পৰিশ্রমী নেতা৷ অসমৰ প্রত্যেকজন মানুহে এই কথা স্বীকাৰ কৰে৷ চৰকাৰখন ব্যর্থ হ’লে বিৰোধীৰ বাবে এটা ইছ্যু হ’ব৷ কিন্তু ৰাজ্যখনৰ বাবে ভাল নহ’ব৷ ৰাজ্যখন পিছপৰি থাকিব৷ আমি বিচাৰোঁ, অসম দেশৰ ৫খন শ্রেষ্ঠ ৰাজ্যৰ ভিতৰত এখন হিচাপে গঢ় লৈ উঠক৷ নতুন চৰকাৰখনে এটা মাহত যি সক্রিয়তাৰে কাম কৰিছে, এনে সক্রিয়তাৰে কাম কৰি গ’লে স্বাভাৱিকতে ৰাইজৰ পৰা প্রশংসা পাব৷
সাক্ষাৎগ্রহণকাৰীৰ ফোনঃ ৮৬৩৮৪–৪৫৭৭৪