নিয়মীয়া বাৰ্তা ২৩ জুনঃ ৰাজ্য চৰকাৰৰ কর্মচাৰীসকল উপকৃত হ’ব পৰাকৈ চৰকাৰে গ্রহণ কৰা ‘আপোন ঘৰ’ আঁচনিৰ হিতাধিকাৰীৰ ঋণ ৰেহাইৰ বাবে আজি বিত্ত বিভাগে ৩৮.৫০ কোটি টকাৰ অনুমোদন জনায়৷ হিতাধিকাৰী কর্মচাৰীসকলে কেইবামাহ ধৰি সুদৰ অংশ ৰেহাই নোপোৱাৰ বিষয়টো ইতিমধ্যে বিত্তমন্ত্রীৰ দৃষ্টিগোচৰ কৰিছিল৷ শেহতীয়াভাৱে ‘আপোন ঘৰ’ আঁচনিৰ হিতাধিকাৰীৰ ঋণ ৰেহাইৰ বিষয়টোৰ ক্ষেত্রত বিত্তমন্ত্রী অজন্তা নেওগে প্রতিবেদন বিচাৰে আৰু বিষয়টোৰ গুৰুত্ব অনুধাৱন কৰি কর্মচাৰীৰ ঋণ ৰেহাইৰ বাবে ৩৮.৫০ কোটি টকা অনুমোদন জনায়৷ তাৎপর্যপূর্ণ যে ৰাজ্য চৰকাৰৰ ‘আপোন ঘৰ’ অভিলাষী আঁচনিখনৰ জৰিয়তে ৰাজ্যৰ ৩১,৯৯৬গৰাকী চৰকাৰী বিষয়া–কর্মচাৰী উপকৃত হৈছে৷
ইতিমধ্যে এই আঁচনিখন ৰূপায়ণৰ বাবে ২০১৭–১৮ বিত্তীয় বর্ষত ৫ কোটি টকা, ২০১৮–১৯ বিত্তীয় বর্ষত ৭০ কোটি টকা, ২০১৯–২০ বিত্তীয় বর্ষত ৪৯.২৪ কোটি টকা মুকলি কৰি দিয়া হৈছিল৷ এই আঁচনিৰ জৰিয়তে এজন কর্মচাৰীয়ে সর্বাধিক ১৫ লাখ টকা পর্যন্ত ঋণ লাভৰ বাবে যোগ্য বিবেচিত হয়৷ আজি বকেয়া ধন ৰাজ্য চৰকাৰে আদায় কৰাৰ পিছত বিত্তমন্ত্রী অজন্তা নেওগক কৃতজ্ঞতা জ্ঞাপন কৰিছে অসম সচিবালয় সেৱা সন্থাই৷ এক বিবৃতিত সন্থাৰ সভাপতি প্রদীপ গগৈ আৰু সাধাৰণ সম্পাদক পার্থ হাজৰিকাই কয় যে অনাদায় সুদৰ অংশৰ বাবে প্রয়োজন হোৱা ধন অনতিপলমে মোকলাই দিয়াৰ বাবে বিত্ত বিভাগে প্রয়োজনীয় পদক্ষেপ গ্রহণ কৰিব৷ একে সময়তে এই আঁচনিৰ ধাৰাবাহিকতা অক্ষুণ্ণ ৰাখি নতুন ইচ্ছুক কর্মচাৰীসকলকো পৰৱর্তী বিত্তীয় বর্ষত কম সুদত গৃহ ঋণ লাভৰ ব্যৱস্থা কৰিবলৈ চৰকাৰে যাৱতীয় পদক্ষেপ গ্রহণ কৰিব বুলিও সন্থাই আশা প্রকাশ কৰে৷