ভাৰতৰ ডেল্টা প্রকৰণ আমেৰিকাৰ প্রত্যাহ্বান

নিয়মীয়া বাৰ্তা ২৪ জুনঃ ক’ৰোনা ভাইৰাছ মহামাৰীৰ ভাৰতত ধৰা পৰা ডেল্টা প্রকৰণে আমেৰিকাৰ বাবে পুনৰ ভয়াৱহ পৰিস্থিতি কঢ়িয়াই আনিব পাৰে৷ আমেৰিকাই ক’ভিড–১৯ মহামাৰীৰ মোকাবিলা কৰাৰ ক্ষেত্রত যি যুঁজ চলাই আছে, ডেল্টা প্রকৰণে তাত সৃষ্টি কৰিব পাৰে তীব্র প্রত্যাহ্বান৷ বিশেষকৈ আমেৰিকাৰ সীমান্তত পৰিস্থিতি অধিক কঠোৰ কৰি নুতুলিলে ডেল্টা প্রকৰণৰ সংক্রমণে পুনৰ সংহাৰ সৃষ্টি কৰিব পাৰে দেশখনত৷ এই আশংকা ব্যক্ত কৰিছে আমেৰিকাৰ সংক্রামক ৰোগ বিশেষজ্ঞ ডাঃ এন্থনী ফাউচিয়ে৷ ফাউচি হৈছে হোৱাইট হাউছৰ চিকিৎসা পৰামর্শদাতা৷

ডেল্টা প্রকৰণৰ সংক্রমণৰ হাৰ অতি বেছি বুলি উল্লেখ কৰিছে বিশেষজ্ঞ চিকিৎসকগৰাকীয়ে৷ মূল ক’ভিড–১৯ প্রকৰণৰ তুলনাত ডেল্টা প্রকৰণে দ্রুত হাৰত সামাজিক সংক্রমণ ঘটাব পাৰে৷ অর্থাৎ যদি এই নতুন প্রকৰণৰ সংক্রমণে আমেৰিকাত সামাজিক সংক্রমণৰ ৰূপ ধাৰণ কৰে, তেন্তে পূর্বতকৈও জটিল হৈ পৰিব পৰিস্থিতি৷ গতিকে ডাঃ ফাউচিয়ে বাইডেন প্রশাসনক এইক্ষেত্রত বিশেষ নজৰ দিবলৈ আহ্বান জনাইছে৷

বিশ্ব স্বাস্থ্য সংস্থাৰ মুখ্য বিজ্ঞানীয়ে ইতিমধ্যে ক’ভিড–১৯ৰ ডেল্টা প্রকৰণে গোলকীয় ৰূপ ধাৰণ কৰিবলৈ সক্ষম হোৱা বুলি সতর্কবাণী কৰিছে৷ অকল সেয়াই নহয়, সংস্থাটোৰ তৰফৰ পৰা মহামাৰীৰ এই নতুন প্রকৰণৰ মোকাবিলা কৰিবলৈ সকলো দেশকে কঠোৰ প্রট’কল মানি চলিবলৈ আহ্বান জনোৱা হৈছে৷ স্মর্তব্য যে ফাইজাৰ আৰু বায়’এনটেকৰ ভেকচিন ডেল্টা প্রকৰণৰ সংক্রমণ প্রতিৰোধ কৰাৰ ক্ষেত্রত সক্ষম বুলি ফাউচিয়ে ঘোষণা কৰিছে৷ গতিকে নতুন প্রকৰণৰ ভাইৰাছৰ সামাজিক সংক্রমণ প্রতিৰোধ কৰিবলৈ হ’লে সকলো লোককে ভেকচিন প্রদান কৰাৰ প্রয়োজন আছে বুলিও বিশেষজ্ঞ চিকিৎসকগৰাকীয়ে ঘোষণা কৰিছে৷