নিয়মীয়া বাৰ্তা ১৫ জুলাইঃ কেন্দ্রীয় মন্ত্রী পীয়ূষ গোৱেলে ৰাজ্যসভাত বিজেপি দলৰ নতুন নেতা হিচাপে দায়িত্ব গ্রহণ কৰিব৷ উল্লেখনীয় যে দলৰ পূর্বৰ নেতা থাৱাৰচান্দ গেহলটক কর্ণাটকৰ নতুন ৰাজ্যপাল হিচাপে নিযুক্তি দিয়া হৈছে৷ নতুন ৰাজ্যপাল হিচপে নিযুক্তি লাভ কৰাৰ পিছতেই গেহলটে বিজেপি দলৰ ৰাজ্যসভাৰ নেতাৰ পৰা পদত্যাগ কৰিছে৷ লক্ষণীয়ভাৱে গোৱেলে বর্তমান ৰাজ্যসভাত বিজেপি দলৰ উপ–মুৰব্বী হিচাপে দায়িত্ব পালন কৰি আছে৷ ১১ জুলাইত গেহলটে কর্ণাটকৰ ৰাজভৱনত ৰাজ্যপাল হিচাপে শপত লোৱাৰ পিছতে ৰাজ্যসভাত বিজেপি দলৰ নেতাৰ আসনখন খালী হৈ আছিল৷ আজি দলৰ তৰফৰ পৰা পীয়ূষ গোৱেলে নতুন নেতা হিচাপে দায়িত্ব ল’ব বুলি আনুষ্ঠানিকভাৱে ঘোষণা কৰা হৈছে৷ লক্ষণীয়ভাৱে কেন্দ্রীয় মন্ত্রী ভূপেন্দ্র যাদৱ আৰু নির্মলা সীতাৰমণৰো নাম এইক্ষেত্রত চর্চালৈ আহিছিল যদিও দলে গোৱেলক পছন্দ কৰে৷