নিয়মীয়া বাৰ্তা ২০ জুলাইঃ টীম ইণ্ডিয়া আৰু শ্রীলংকাৰ মাজৰ তিনিখনীয়া এদিনীয়া মেচৰ শৃংখলাটোৰ দ্বিতীয়খন মেচ আজি কলম্বোৰ প্রেমদাসা ষ্টেডিয়ামত খেলোৱা হ’ব৷ ইতিমধ্যে শৃংখলাটোৰ প্রথমখন মেচত সহজ বিজয় সাব্যস্ত কৰি আত্মবিশ্বাস তুংগত থকা ধাৱন বাহিনীয়ে শৃংখলা দখলৰ লক্ষ্যৰে আজিৰ মেচখনত অৱতীর্ণ হ’ব৷
দেওবাৰে হৈ যোৱা প্রথমখন মেচত সতীর্থসকলৰ প্রদর্শনত সন্তুষ্টি ব্যক্ত কৰি অধিনায়ক ধাৱনে কয় যে আশা কৰা মতে সতীর্থসকলে উন্নত প্রদর্শন দাঙি ধৰিছে আৰু কাইলৈৰ মেচখনতো তেওঁলোকে এই ধাৰা অব্যাহত ৰাখিব পাৰিব৷ অ’পেনাৰ পৃথ্বি শ্ব আৰু ঈষাণ কিষণৰ বেটিং প্রদর্শনক প্রশংসা কৰি অধিনায়ক ধাৱনে লগতে কয় যে দুয়োগৰাকী প্রতিভাৱান বেটছমেনৰ দুর্দান্ত প্রদর্শনৰ বাবে মেচখনত আমাৰ বিজয় সহজ হৈ পৰিছিল৷
বেটছমেনৰ লগতে বলাৰসকলেও নিজৰ দায়িত্ব সুচাৰুৰূপে পালন কৰিছে৷ অৱশ্যে অভিজ্ঞ পেচ বলাৰ ভুবনেশ্বৰ কুমাৰে উইকেট লাভ নকৰাটো কিছু চিন্তাৰ কাৰক যদিও আজি মেচখনত তেওঁ ছন্দ ঘূৰাই পাব বুলি আশা ব্যক্ত কৰিছে অধিনায়কগৰাকীয়ে৷ ইফালে, শৃংখলাটোত প্রত্যাৱর্তনৰ লক্ষ্য লৈছে ঘৰুৱা দল শ্রীলংকাই৷ কাইলৈৰ মেচখনত সতীর্থসকলৰ পৰা উন্নত প্রদর্শন আশা কৰিছে দলটোৰ অধিনায়ক ডাছুন ছানাকাই৷