নিয়মীয়া বাৰ্তা, ১৮ আগষ্টঃ আফগানিস্তানৰ শাসনভাৰ তালিবানৰ হাতলৈ যোৱাত দেশখনৰ আগশাৰীৰ ক্রিকেটাৰসকলৰ ভৱিষ্যৎ অনিশ্চিত হৈ পৰিছে যদিও আগন্তুক আই পি এলত দেখিবলৈ পোৱা যাব ৰছিদ খান আৰু মহম্মদ নবীক৷
আফগানিস্তানৰ তাৰকা ক্রিকেটাৰ দুগৰাকীয়ে অহা ১৯ ছেপ্ঢেম্বৰৰ পৰা ইউ এ ইত আৰম্ভ হ’বলগীয়া আই পি এলৰ দ্বিতীয় লেগত অংশ ল’ব বুলি ছানৰাইজার্ছ হায়দৰাবাদে প্রকাশ কৰিছে৷ দলটোৰ চি ই অ’ কে শ্বানমুগামে সংবাদ মাধ্যমৰ আগত কয় যে ৰছিদ আৰু নবী সম্প্রতি ইংলেণ্ডত আছে৷ তেওঁলোকে ‘দ্য হাণ্ড্রেড’ লীগত অংশ লোৱাৰ পিছতে পোনে পোনে ইউ এ ইলৈ উৰা মাৰিব৷
ইফালে বি চি চি আয়ে আফগানিস্তানৰ ৰাজনৈতিক অস্থিৰতাৰ ওপৰত চোকা নজৰ ৰাখিছে আৰু ৰছিদ খান, মহম্মদ নবীৰ ভৱিষ্যৎ সন্দর্ভত আফগানিস্তান ক্রিকেট ব’ডৰ সৈতে আলোচনা কৰিছে৷
মন কৰিবলগীয়া যে আফগানিস্তানৰ তিনিগৰাকী তাৰকা ক্রিকেটাৰ ক্রমে ৰছিদ খান, মহম্মদ নবী আৰু মুজিব জাড্রান হ’ল আই পি এলৰ নিয়মীয়া খেলুৱৈ৷ তিনিগৰাকী ক্রিকেটাৰে আফগানিস্তানৰ ৰাজনৈতিক অস্থিৰতা দূৰ কৰাৰ ক্ষেত্রত হস্তক্ষেপ গ্রহণ কৰিবলৈ বিশ্ব নেতৃত্বক আহ্বান জনাইছে৷