শিক্ষাৰ আদিপাঠ লোৱা যোৰহাট বাল্য ভৱনত আৱেগিক মুখ্যমন্ত্রী

নিয়মীয়া বাৰ্তা, ২০ আগষ্টঃ বর্তমানৰ মুখ্যমন্ত্রী ড০ হিমন্ত বিশ্ব শর্মাই শিক্ষাৰ আদিপাঠ গ্রহণ কৰিছিল যোৰহাট বাল্যভৱনত৷ উজনি অসমৰ প্রথমখন মণ্টেশ্বৰী শিক্ষাৰ শিক্ষানুষ্ঠান যোৰহাট বাল্যভৱনত ১৯৭২ চনত ড০ হিমন্ত বিশ্ব শর্মাই নিম্ন শ্রেণীত নামভর্তি কৰিছিল৷

সুদীর্ঘ সময়ৰ পাছত বৃহস্পতিবাৰে তেওঁ বিদ্যালয়খনত উপস্থিত হৈ আৱেগিক হৈ পৰে৷ বিদ্যালয়ত সযতনে ৰখা উপস্থিতিৰ বহীত নিজৰ নাম দেখি আনন্দত মুখ উজলি উঠে মুখ্যমন্ত্রী ড০ শর্মাৰ৷ তেওঁ কয়– নাম লিখোঁতে মোৰ নাম ২৮ত আছিল৷ পাছৰ বছৰ এক নম্বৰ হৈ গ’লোঁ৷ বাল্যভৱন আছিল আমাৰ বাবে মন্দিৰৰ দৰে৷

পুৰণি স্মৃতি ৰোমন্থন কৰি মুখ্যমন্ত্রী ড০ শর্মাই কয় যে বাল্যভৱনত তেওঁৰ দুই জ্যেষ্ঠ ভাতৃ জয়ন্ত বিশ্ব শর্মা, দিগন্ত বিশ্ব শর্মা আৰু প্রয়াত ভাতৃ প্রশান্ত বিশ্ব শর্মাও অধ্যয়ন কৰিছিল৷ ‘এই পৱিত্র স্থান মন্দিৰতে মোৰ প্রথম শিক্ষা জীৱন আৰম্ভ হৈছিল’ বুলি উল্লেখ কৰি মুখ্যমন্ত্রীগৰাকীয়ে কয় যে খোজ কাঢ়িয়ে তেওঁ বিদ্যালয়লৈ অহা–যোৱা কৰিছিল৷ আনহাতে টিফিনৰ সময়ত পাচিত সজাই থোৱা লফ আৰু কল খোৱাৰ স্মৃতি স্মৰণ কৰি তেওঁ বিদ্যালয়খনৰ উত্তৰণৰ বাবে শিক্ষক–শিক্ষয়িত্রীস লোৱা পদক্ষেপৰ বাবে উচ্চ প্রশংসা কৰি কৃতজ্ঞতা জ্ঞাপন কৰে৷ বিদ্যালয়খনক মণ্টেশ্বৰীৰ পৰা উচ্চতৰ মাধ্যমিকলৈ এখন পূর্ণাংগ বিদ্যালয় হিচাপে গঢ়ি তোলা হ’ব বুলিও তেওঁ মন্তব্য কৰে৷ মাজে মাজে শিক্ষামন্ত্রী ডাঃ ৰণোজ পেগু বিদ্যালয়খনলৈ আহি কাম–কাজৰ বুজ ল’ব বুলিও তেওঁ কয়৷

ইফালে মুখ্যমন্ত্রীজনৰ নিজৰ পৰিয়ালৰ তৰফৰ পৰা উন্নয়নমূলক পদক্ষেপ লোৱা হ’ব বুলিও তেওঁ সদৰী কৰে৷ বিদ্যালয়খনৰ শিক্ষক–শিক্ষয়িত্রী আৰু কিছু ছাত্র–ছাত্রী, প্রাক্তন ছাত্রৰ সৈতে এক অনুষ্ঠানতো তেওঁ অংশগ্রহণ কৰে৷ বিদ্যালয় কর্তৃপক্ষৰ তৰফৰ পৰা মুখ্যমন্ত্রীজনক বিভিন্ন উপহাৰেৰে সম্বর্ধনা জনোৱা হয়৷ ইফালে মুখ্যমন্ত্রীজনক নিজ বিদ্যালয়ত পাই আনন্দিত হৈ পৰে শিক্ষক–শিক্ষয়িত্রী, কর্মচাৰী, ছাত্র–ছাত্রীসকল৷ আজিৰ দিনটো বিদ্যালয়খনৰ বাবে স্মৰণীয় হৈ ৰ’ব বুলি তেওঁলোকে মন্তব্য কৰে৷

ইপিনে বিদ্যালয়খনৰ প্রধান শিক্ষয়িত্রী জোনালী বৰুৱাই জানিবলৈ দিয়া মতে, মুখ্যমন্ত্রী ড০ হিমন্ত বিশ্ব শর্মাৰ পত্নী তথা প্রাইড ইষ্ট এণ্টাৰটেইনমেণ্টৰ পৰিচালন সঞ্চালক ৰিণিকি ভূঞা শর্মাই বিদ্যালয়খনৰ উন্নয়নৰ বাবে ১ কোটি টকা আগবঢ়াইছে৷