ছয়গাঁও আৰক্ষীৰ মহানুভৱতা

নিয়মীয়া বাৰ্তা, ২৬ আগষ্ট : ছয়গাঁও আৰক্ষীৰ মহানুভৱতা । পথত অনাই বনাই ঘুৰি ফুৰা এজন বৃদ্ধক উদ্ধাৰ কৰি আনি থৈ আহিলে বৃদ্ধাশ্ৰমত । ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকে আজি কুকুৰমাৰাৰ জীয়াকুৰৰ কেউ কিছু নোহোৱা ৰাজধৰ কলিতা নামৰ ৭০ বছৰীয়া বৃদ্ধজনে পথত অনাই বনাই ঘুৰি থকাৰ খবৰ লাভ কৰে ।

আৰক্ষী বিষয়া গৰাকীয়ে এই খবৰ লাভ কৰাৰ পিছতে আৰক্ষী দল এটি গৈ বৰটাৰীৰ পৰা বৃদ্ধজনক উদ্ধাৰ কৰি ছয়গাঁও আৰক্ষী থানালৈ লৈ আহে । বৃদ্ধাগৰাকীক থানালৈ লৈ আহি আৰক্ষী বিষয়া গৰাকীয়ে খাদ্য খুৱোৱাৰ লগতে নতুন কাপোৰ পিন্ধাই দি বামুণীগাঁওস্থিত বৃদ্ধাশ্ৰমত থৈ আহে । আৰক্ষী বিষয়াগৰাকীৰ এই মহানুভৱতাক ছয়গাঁৱৰ সচেতন মহলে ভূয়সী প্ৰশংসা কৰিছে ।