নিয়মীয়া বাৰ্তা, ১২ অক্টোবৰঃ আই পি এলত খিতাপ জয়ৰ সপোন পুনৰ এবাৰ আধৰুৱা হৈ ৰ’ল ৰয়েল চেলেঞ্জার্ছ বাংগালুৰু আৰু অধিনায়ক বিৰাট কোহলিৰ৷ সোমবাৰে অনুষ্ঠিত এলিমিনেটৰত কোহলি বাহিনীয়ে তীব্র যুঁজ দিও কলকাতা নাইটৰাইডার্ছৰ হাতত ৪ উইকেটত পৰাজয় স্বীকাৰ কৰে৷ ১৩৯ ৰানৰ লক্ষ্যৰ পিছ লৈ কলকাতাই দুটা বল বাকী থকা অৱস্থাত ৬ উইকেটৰ বিনিময়ত ৰোমাঞ্চকৰ জয়ৰ সোৱাদ লাভ কৰে৷ দলটোৰ হৈ অ’পেনাৰ শুভমন গিলে ২৯, ভেংকটেশ আয়াৰ আৰু সুনীল নাৰিনে ২৬ ৰানৰ অৰিহণা আগবঢ়ায়৷
আৰ চি বিৰ হৈ মহম্মদ ছিৰাজ, হর্ষল পেটেল আৰু য়ুজৱেন্দ্র চাহালে দুটাকৈ উইকেট দখল কৰে৷ ইয়াৰ পূর্বে টছত জিকি প্রথমে ইনিংছ মুকলি কৰি ৰয়েল চেলেঞ্জার্ছ বাংগালুৰুৱে নির্ধাৰিত ২০ অ’ভাৰত ৭ উইকেটৰ বিনিময়ত ১৩৮ ৰান সংগ্রহ কৰে৷ দলটোৰ হৈ অধিনায়ক বিৰাট কোহলিয়ে সর্বাধিক ৩৯ আৰু উদীয়মান অ’পেনাৰ দেৱদত্ত পাড়িকালে ২১ ৰানৰ অৰিহণা আগবঢ়ায়৷
তেওঁলোকে প্রথম উইকেটত ৪৯ ৰান যোগ দি আৰ চি বিক সুন্দৰ আৰম্ভণি প্রদান কৰে যদিও মিডল অর্ডাৰৰ শোচনীয় ব্যর্থতাই দলটোক বিপদত পেলায়৷ গ্লেন মেক্সৱেলে ১৫, শ্রীকৰ ভৰতে ৯, এবি ডি ভিলিয়ার্ছে ১১, শ্বাহবাজ আহমেদে ১৩, ডেন ক্রিষ্টিয়ানে ৯ ৰানত আউট হয়৷ কোহলিয়ে ৩৩ বলত ৫টা বাউণ্ডেৰীৰ সহায়ত ইনিংছটো সজায়৷ কলকাতা নাইটৰাইডার্ছৰ হৈ তাৰকা স্পিনাৰ সুনীল নাৰিনে মাত্র ২১ ৰান ব্যয় কৰি চাৰিটা উইকেট দখল কৰিবলৈ সক্ষম হয়৷
উল্লেখ্য যে আৰ চি বিয়ে এতিয়ালৈকে ৬ বাৰ আই পি এলৰ প্লেফ খেলিছে যদিও এবাৰো খিতাপ জয় কৰিব পৰা নাই৷ অধিনায়কৰ ৰূপত কোহলিৰ বাবে এয়া আছিল অন্তিমখন আই পি এল৷