দীপাৱলীৰ আনন্দৰ মাজতে নগাঁৱৰ উত্তৰ হয়বৰগাঁৱত বিধ্বংসী অগ্নিকাণ্ড

নিয়মীয়া বাৰ্তা  ,৫ নৱেম্বৰঃদীপাৱলীৰ আনন্দৰ মাজতে কালি নিশা নগাঁৱৰ উত্তৰ হয়বৰগাঁৱত এক ভয়াবহ অগ্নিকাণ্ড সংঘটিত হয়। মাজনিশা হঠাৎ সংঘটিত হোৱা অগ্নিকাণ্ডৰ ফলত কেইবালক্ষাধিক টকাৰ সামগ্ৰী জুইত জাহ যায়। উত্তৰ হয়বৰগাঁৱৰ হোটেল ব্লু বাৰ্ডৰ সমীপৰ বৃহৎ ব্যৱসায়ীক এলেকাত থকা কাপোৰৰ দোকানত সংঘটিত অগ্নিকাণ্ডত কাপোৰসহ কেইবালক্ষাধিক টকাৰ সামগ্ৰী সম্পূৰ্ণৰূপে ভস্মীভূত হয়। আনকি দোকানখনৰ স্বত্বাধিকাৰী সবিতা শইকীয়াৰ কন্যাৰ বিয়াৰ বাবে ক্ৰয় কৰা সমস্ত নতুন কাপোৰো অগ্নিকাণ্ডত ভস্মীভূত হয় ।

অগ্নিকাণ্ড সংঘটিত হোৱাৰ কিছু সময় পিছত অগ্নিনিৰ্বাপক বাহিনীৰ বাহন আহি উপস্থিত হয় যদিও ইয়াৰ পূৰ্বেই স্থানীয় লোকৰ তৎপৰতাত জুই নিয়ন্ত্ৰনলৈ আহে। অৱশ্যে পৰৱৰ্তী সময়ত অগ্নিনিৰ্বাপক বাহিনীৰ লোকে জুই সম্পুৰ্ণৰূপে নিৰ্বাপন কৰিবলৈ সক্ষম হয়। অগ্নিকাণ্ডৰ কাৰণ এই পৰ্যন্ত জানিব পৰা হোৱা নাই যদিও বৈদ্যুতিক বিজুতি নাইবা ফটকা আতছবাজীৰ বাবে অগ্নিকাণ্ড সংঘটিত হোৱাৰ সন্দেহ প্ৰকাশ কৰিছে স্থানীয় লোকে।