এছআই নিযুক্তি কেলেংকাৰিৰ তদন্ত প্রতিবেদন দাখিলঃ ছয়খন চার্জশ্বীটত ৬০জনৰ নাম, জে’লত বন্দী ১০ অভিযুক্ত
নিয়মীয়া বাৰ্তা, ২১ ডিচেম্বৰঃ সমগ্র ৰাজ্য জোকাৰি যোৱা অসম আৰক্ষীৰ উপ–পৰিদর্শক (এছ আই) নিযুক্তি কেলেংকাৰিৰ তদন্ত প্রতিবেদন দাখিল কৰা হৈছে৷ বিধায়ক ৰেকিবুদ্দিন আহমেদৰ এক লিখিত প্রশ্ণৰ উত্তৰত আজি সদনৰ মজিয়াত এই কথা সদৰী কৰে গৃহ বিভাগৰ দায়িত্বত থকা মুখ্যমন্ত্রী ড০ হিমন্ত বিশ্ব শর্মাই৷ এই সন্দর্ভত সবিশেষ তথ্য সদনত দাঙি ধৰি মুখ্যমন্ত্রী ড০ শর্মাই কয় যে অপৰাধ অনুসন্ধান বিভাগৰ আৰক্ষী থানাত ৰুজু হোৱা ২১/২০২০নং গোচৰমর্মে ০৭/২০২০ নম্বৰৰ অভিযোগনামা ২০২০ চনৰ ১৮ ডিচেম্বৰত ৩৬জনৰ বিৰুদ্ধে দাখিল কৰা হৈছে৷ ইয়াৰ পাছত ২০২১ চনৰ ২৩ এপ্রিলত ৬জনৰ বিৰুদ্ধে পৰিপূৰক অভিযোগনামা দাখিল কৰা হয়৷ অর্থাৎ এই গোচৰটোত মুঠ ৪২জনৰ বিৰুদ্ধে অভিযোগনামা দিয়া হৈছে৷ তদুপৰি নলবাৰী আৰক্ষী থানাৰ ৫০৭/২০২০ নম্বৰৰ গোচৰটোত অভিযোগনামা দিয়া হৈছে ১৮জনৰ বিৰুদ্ধে৷ এই গোচৰটোত দাখিল কৰা অভিযোগনামাকেইখনৰ নম্বৰ হৈছে – ৩৭৫/২০২০, ৪৩/২০২১, ১২৫/২০২১ আৰু ৩২২/২০২১৷ এছ আই নিযুক্তি কেলেংকাৰি সন্দর্ভত সামগ্রিকভাৱে ৬খন অভিযোগনামা দাখিল কৰা হৈছে৷ য’ত সন্নিৱিষ্ট হৈছে ৬০জনৰ নাম৷ এই ৬০জন লোকৰ ভিতৰত ১০জন বর্তমানেও কাৰাগাৰত থকাৰ বিপৰীতে বাকী ৫০জনে জামিন লাভ কৰিছে৷ ইফালে, এছ আই নিযুক্তি কেলেংকাৰিৰ তদন্ত ভাৰ চি বি আইক অর্পণৰ বিষয়টো কার্যতঃ নস্যাৎ কৰিছে ৰাজ্য চৰকাৰে৷ এই সম্পর্কত আজি মুখ্যমন্ত্রী ড০ শর্মাই কয় যে তদন্ত যথাসময়ত সম্পূর্ণ হোৱা হেতুকে তদন্ত প্রক্রিয়া লেহেম হোৱা বা চি বি আইক অর্পণ কৰাৰ প্রসংগ নাহে৷