নিয়মীয়া বাৰ্তা, ছিপাঝাৰ, ৩০ অক্টোবৰ : যোগাসন ক্ৰীড়াৰ জৰিয়তে ইতিমধ্যে দৰংবাসীৰ মাজত বিশেষভাৱে পৰিচিত হৈ পৰা ছিপাঝাৰৰ বৰদৌলগুৰিৰ দীপাংকৰ নাথক প্ৰদান কৰা হৈছে যোগাসন সম্ৰাট খিতাপ।
অসম যোগাসন ক্ৰীড়া সন্থাৰ উদ্যোগত আৰু দৰং জিলা যোগাসন ক্ৰীড়া সন্থাৰ সহযোগত জিলা পুথিভঁৰাল প্ৰেক্ষাগৃহত অনুষ্ঠিত হৈ যোৱা ষষ্ঠ আন্তঃজিলা যোগাসন ক্রীড়া প্ৰতিযোগিতাত দীপাংকৰ নাথে ছুপাৰ ছিনিয়ৰ পুৰুষ শাখাত প্রথম স্থান লাভ কৰাৰ লগতে যোগাসন সম্ৰাট সম্মান পাবলৈ সক্ষম হয়। ভাস্কৰ জ্যোতি চাংমাই আৰু মধুস্মিতা দুৱৰাই আনুষ্ঠানিকভাৱে এই সন্মান প্ৰদান কৰে যুৱ খেলুবৈগৰাকীক।
দীপাংকৰ নাথৰ কৃতিত্বই দৰং জিলাৰ যোগাসন ক্রীড়াৰ ক্ষেত্ৰখনক উজ্জীৱীত কৰাৰ লগতে ওপজা গাও বৰদৌলগুৰি (কঁকাইতোলা )লৈও সুনাম কঢ়িয়াই আনিছে। অসমৰ যোগাসন ক্ৰীড়া সন্থাৰ সভাপতি হীৰেন সৰকাৰ আৰু সম্পাদক নলিন নাথেও শুভেচ্ছা জনাইছে দীপাংকৰ নাথক।
আনহাতে, দৰং জিলা যোগাসন ক্ৰীড়া সন্থাৰ সভাপতি মধুসূদন ভট্টাচাৰ্য আৰু সম্পাদিকা হিমাদ্ৰিতা বৰুৱায়ো অভিনন্দন আৰু শুভেচ্ছা জনাইছে দীপাংকৰ নাথক। ইফালে, নৱপ্ৰজন্মক যোগাসন কৰি নিজৰ শৰীৰটো সুস্থ কৰি ৰখাৰ লগতে বিভিন্ন ক্ৰীড়াৰ লগত জড়িত হবলৈ আহ্বান জনাইছে যোগাসন সম্ৰাট দীপাংকৰ নাথে।