নতুন ক্রীড়া বিপ্লৱৰ সূচনা কৰি গুৱাহাটীৰ বর্ষাপাৰাস্থিত এচিএ ষ্টেডিয়ামৰ ৯১ য়ার্ডছ ক্লাব অ’ডিটৰিয়ামত আয়োজন কৰা অনুষ্ঠানত চৰকাৰীভাৱে মুকলি কৰা হয় ৰাজ্যৰ ঘৰুৱা ক্রিকেটৰ সর্ববৃহৎ প্রতিযোগিতা ‘অসম প্রিমিয়াৰ লীগ’৷
এই ঐতিহাসিক ক্ষণত মুখ্য অতিথি হিচাপে উপস্থিত থাকি লীগৰ চৰকাৰী ল’গ’, আকর্ষণীয় ট্রফী আৰু প্রতিযোগিতাত অংশ ল’বলগীয়া আঠোটা ফ্রেঞ্চাইজী দলৰ নাম আনুষ্ঠানিকভাৱে উন্মোচন কৰে মুখ্যমন্ত্রী ড০ হিমন্ত বিশ্ব শর্মাই৷
অনুষ্ঠানটোত সন্মানীয় অতিথি হিচাপে উপস্থিত থাকে ভাৰতীয় ক্রিকেট নিয়ন্ত্রণ ব’ৰ্ডৰ অবৈতনিক সম্পাদক দেৱজিত শইকীয়া৷ তদুপৰি, অসম ক্রিকেট সন্থাৰ সভাপতি তৰংগ গগৈ, সম্পাদক সনাতন দাস, এপিএলৰ অধ্যক্ষ ৰাজদীপ ওজা আৰু ফ্রেঞ্চাইজীৰ স্বত্বাধিকাৰীসকল অনুষ্ঠানত উপস্থিত থাকে৷
আদৰণী ভাষণত ৰাজদীপ ওজাই কয় যে এপিএলে ৰাজ্যৰ উদীয়মান ক্রিকেটাৰসকলৰ বাবে এখন পেচাদাৰী আৰু দীর্ঘম্যাদী মঞ্চ প্রদান কৰিব৷ ক্রিকেটপ্রেমীসকলৰ বাবে আটাইতকৈ সুখবৰটো হৈছে যে লীগৰ মেচসমূহ ‘ষ্টাৰ স্প’ৰ্টছ’ চেনেলত পোনপটীয়া সম্প্রচাৰ কৰা হ’ব আৰু ‘জিঅ’হটষ্টাৰ’ এপযোগে সমগ্র দেশতে লাইভ ষ্ট্রীমিং কৰা হ’ব৷
প্রথম সংস্কৰণত অংশ ল’বলগীয়া আঠোটা দল হৈছে যোৰহাট ষ্টেলিয়নছ, তেজপুৰ টাইটানছ, ডিব্রুগড় ৱাৰিয়র্ছ, বৰাক লিজেণ্ডছ, নগাঁও ৰেঞ্জার্ছ, বৰপেটা ব্রেভছ, গুৱাহাটী ৰয়েলছ আৰু চৰাইদেউ ছানৰাইজছ৷
এই শুভক্ষণত মুখ্যমন্ত্রী ড০ হিমন্ত বিশ্ব শর্মাই কয়– ‘অসমৰ ৰাইজৰ হৃদয়ত ক্রিকেটৰ সুকীয়া স্থান আছে৷ অসম প্রিমিয়াৰ লীগে যুৱ প্রতিভাক নিজৰ দক্ষতা প্রদর্শন কৰাৰ উপযুক্ত সুযোগ দিব৷ মই নিশ্চিত যে অনাগত দিনত ই দেশৰ ভিতৰতে এটা অন্যতম প্রভাৱশালী ক্রিকেট লীগত পৰিণত হ’ব৷’
ডিজিটেল ডেস্ক, ২২ জুন