নিয়মীয়া বাৰ্তা ১৮ ফেব্ৰুৱাৰীঃ কংগ্রেছৰ ‘অসম বচাও’ক লৈ তীব্র কটাক্ষ কৰিছে মন্ত্রী ড০ হিমন্ত বিশ্ব শর্মাই৷ বুধবাৰে গুৱাহাটীত সংবাদ মাধ্যমৰ আগত মন্ত্রী ড০ শর্মাই ‘অসম বচাওঁ’ শব্দটো ক’ৰ পৰা আহিছে বুলি প্রশ্ণ কৰি তেওঁ কয় যে সেয়া আমাৰ মাতৃভাষাৰ শব্দ হ’ব নোৱাৰে৷ অসমীয়া ভাষাত অসমক বচাওক হ’ব পাৰে, কিন্তু অসম বচাওঁ বুলি কোনো শব্দ নাই৷ কোনখন অভিধানৰ পৰা সেই শব্দ আহিছে? সেইদৰে কংগ্রেছে বদৰুদ্দিন আজমলৰ ওচৰত নির্লজ্জ আত্মসমর্পণ কৰি চিৰদিনৰ বাবে কংগ্রেছক ৰাইজৰ মাজৰ পৰা আঁতৰাই লৈ গ’ল বুলি তাৎপর্যপূর্ণ মন্তব্য কৰে৷ কংগ্রেছৰ সুস্মিতা দেৱ বিজেপিলৈ আহিব নেকি বুলি সাংবাদিকে সোধা প্রশ্ণৰ উত্তৰত মন্ত্রী ড০ শর্মাই কয় যে আহিলে আহিব পাৰে৷ কিন্তু তেওঁৰ লগত কোনো কথা পতা নাই৷ বিজেপিত এতিয়া নির্বাচনত টিকট দিব পৰা মানুহ অনাৰ সুবিধা নাই৷ সেয়ে টিকট বিচাৰিব পৰা মানুহ বিজেপিত যোগদান কৰোৱা নাই৷ টিকট বিচৰা মানুহ বিজেপিৰ ভিতৰতে আছে৷
ছত্তিশগড়ৰ মুখ্যমন্ত্রী ভূপেশ ৱাঘেল অসমত কংগ্রেছৰ হৈ নির্বাচনী প্রচাৰৰ বাবে সঘনাই অহাৰ প্রসংগতো তেওঁ কয় যে অনাগত দিনত বিজেপিয়েও ছত্তিশগড়লৈ যাব৷ ইফালে অসম জাতীয় পৰিষদে দান–বৰঙণি সংগ্রহৰ বাবে বেংক একাউণ্ট খোলাৰ প্রসংগত মন্ত্রী ড০ শর্মাই কয় যে একাউণ্ট যদি খুলিছে, ভাল কথা৷ তেওঁলোকে যদি মানুহৰ ঘৰে ঘৰে গৈ, দোকানে দোকানে গৈ চান্দা নিবিচাৰে, তেতিয়াহ’লে তেওঁ নিজেও তেওঁলোকৰ একাউণ্টত বৰঙণি আগবঢ়াব বুলি মন্তব্য কৰে৷