নিশা হৈ পৰিলেই মাতাল হয় নেকি মহানগৰী গুৱাহাটী? কালি নিষিদ্ধ ড্রাগ্ছৰ অভাৰড’জ হৈ নগাঁৱৰ পম্পী বৰুৱাৰ মৃত্যু হোৱাৰ পাছতেই স্বাভাৱিকতেই এই প্রশ্ণৰ উদয় হৈছে৷ ভঙাগড়ৰ গুৱাহাটী চিকিৎসা মহাবিদ্যালয় হাস্পতালত মৃত্যু হৈছিল পম্পী বৰুৱাৰ৷ চিকিৎসকৰ মতে অত্যধিক ড্রাগ্ছ সেৱনেই এই মৃত্যুৰ মূল কাৰণ৷
যুৱতীগৰাকীক অসুস্থ অৱস্থাত হাস্পতাললৈ অনা ইমৰান আলী ওৰফে মোক্তাৰ আলীক পল্টন বজাৰ আৰক্ষীয়ে চলোৱা মাৰাথন জেৰাত বহু ৰহস্যজনক তথ্য পোহৰলৈ আহিছে৷ আৰক্ষীৰ জেৰাত ধৃত ইমৰান আলীয়ে স্বীকাৰ কৰিছে বহু কথা৷ ৩১ আগষ্টৰ দিনা অর্থাৎ কালি পুৱা প্রায় ৮.৩০ বজাতে হেঙেৰাবাৰীৰ নৱোদয় পথত থকা ‘সৃষ্টি ৱেলনেছ চেণ্টাৰ’ নামৰ নিচামুক্তি কেন্দ্রটোৰ পৰা নগাঁৱৰ মাতৃৰ ওচৰলৈ যাম বুলি ওলাই গৈছিল পম্পী বৰুৱা৷ স্বামী আশুতোষ চেতিয়াৰ সৈতে ৩০ আগষ্টৰ নিশাটো একেলগে কেন্দ্রটোৰ ভাৰাঘৰত আছিল পম্পী বৰুৱা৷
স্বামী আশুতোষ চেতিয়াই সদৰী কৰা মতে ৫০০ টকা লৈ তেওঁ নগাঁৱলৈ যাম বুলি ওলাই গৈছিল৷ দিনৰ প্রায় ২ বজাতহে তেওঁৰ মৃত্যুৰ খবৰ স্বামীয়ে লাভ কৰিছিল৷ ক’ত কিদৰে ঘটনাটো সংঘটিত হ’ল এই বিষয়ে ভালদৰে অৱগত নহয় বুলিও তেওঁ লগতে কয়৷
উল্লেখ্য যে পম্পী বৰুৱাৰ ৰহস্যজনক মৃত্যুৰ পাছতে সৃষ্টি ৱেলনেছ চেণ্টাৰৰ বিৰুদ্ধেও বিভিন্ন অভিযোগ উত্থাপন হৈছে৷ কিন্তু কেন্দ্রটোৰ মালিক বর্ণালী বৈশ্যই সকলো অভিযোগ নস্যাৎ কৰি কয় যে ২০২০ চনৰ পৰা প্রায় ৪ বছৰ ধৰি ড্রাগ্ছ আসক্ত হৈ পৰা পম্পী বৰুৱা আৰু তেওঁৰ স্বামী আশুতোষ চেতিয়া দুয়োজনেই কেন্দ্রটোত চিকিৎসাধীন হৈ আছিল৷
পৰৱর্তী সময়ত দুয়ো সুস্থ হৈ পৰাৰ পাছতে কেন্দ্রটোত কর্মৰত হৈ আছিল৷ জানিব পৰা মতে, গোলাঘাট পলিটেকনিকৰ পৰা উত্তীর্ণ হোৱা পম্পী বৰুৱাই ২০১১ চনতে আশুতোষ চেতিয়াৰ সৈতে বিবাহপাশত আবদ্ধ হৈছিল৷ কিন্তু ক’ভিডৰ দুর্যোগকালীন সময়ছোৱাত নিষিদ্ধ ড্রাগ্ছৰ কবলত পৰিছিল দুয়ো স্বামী–স্ত্রী৷ ইয়াৰ বাবে মৃত পম্পী বৰুৱাৰ পৰিয়ালে সংগদোষকেই জগৰীয়া কৰিছে৷
বিগত এবছৰ ধৰি উলুবাৰীত অকলশৰীয়াকৈ ভাৰাঘৰ লৈছিল পম্পী বৰুৱাই৷ ড্রাগ্ছ সেৱনৰ বদ অভ্যাসৰ লগতে নিষিদ্ধ দেহ ব্যৱসায়ৰ সৈতেও পম্পী বৰুৱা জড়িত থকাৰ গুৰুতৰ অভিযোগ উত্থাপন হৈছে৷ শেহতীয়াকৈ পম্পী বৰুৱাৰ তথ্যসম্বলিত এটা হোৱাটছএপ বার্তা ম’বাইলে ম’বাইলে ভাইৰেল হৈ পৰিছে৷ নৈশ যাপনৰ বাবদ গ্রাহকৰ পৰা ৭ হাজাৰ টকা দাবী কৰিছিল পম্পী বৰুৱাই৷ মহিলাগৰাকীৰ মৃত্যুৰ পাছতেই এনেবোৰ কথাৰ যুক্তিযুক্ততা নাই যদিও অপ্রিয় হ’লেও এয়াই সত্য৷
পল্টন বজাৰ আৰক্ষীয়ে গ্রেপ্তাৰ কৰা ৰেপিড’চালক ইমৰান ওৰফে মোক্তাৰ আলীৰ ম’বাইল ফোন পৰীক্ষা কৰাৰ পাছতে এই ৰহস্য পোহৰলৈ আহিছে৷ মহানগৰীৰ একাংশ হোটেলত যুৱতীৰ লগতে ড্রাগ্ছো যোগান ধৰিছিল ইমৰান আলীয়ে৷
আৰক্ষীয়ে ধৃত ইমৰান আলীৰ ম’বাইলত পল্টন বজাৰ ২নং ৰে’লগেটৰ একাংশ ড্রাগ্ছ পেডলাৰৰ নাম আৰু কিছুমান সন্দেহজনক নম্বৰ উদ্ধাৰ কৰিছে৷ বিগত এবছৰ ধৰি পম্পী বৰুৱাৰ সৈতে চিনাকি থকা ইমৰান আলীয়ে প্রায়েই বিভিন্ন হোটেললৈ অনা–নিয়া কৰিছিল৷ পম্পী বৰুৱাক হেঙেৰাবাৰীৰ ৰিহেব চেণ্টাৰৰ পৰা ইমৰান আলীয়ে ইছলামপুৰলৈ নিছিল৷ ইছলামপুৰৰ গৃহ নং ২৪ৰ এটা ভাৰাঘৰত কোনো যুৱকৰ সৈতে পম্পী বৰুৱাই কৰিছিল ড্রাগ্ছৰ পার্টী৷
অৱশ্যে কোন যুৱকৰ সৈতে পম্পী বৰুৱাই ড্রাগ্ছ লৈছিল সেয়া এতিয়াও পোহৰলৈ অহা নাই৷ ধৃত ইমৰান আলীৰ স্বীকাৰোক্তিৰ ভিত্তিত আৰক্ষীয়ে যুৱকজনৰ সন্ধান অব্যাহত ৰাখিছে৷ লক্ষণীয় যে কৰুণভাৱে মৃত্যুক সাবটিবলগীয়া হোৱাৰ পাছতো পম্পী বৰুৱাৰ পৰিয়ালে কোনো এজাহাৰ দাখিল কৰা নাই৷ কিন্তু আৰক্ষীয়ে নিজাববীয়াকৈ এটা গোচৰ ৰুজু কৰি তদন্ত চলাব বুলি জানিব পৰা গৈছে৷
Niyomiya Barta desk, 2 September