নিয়মীয়া বাৰ্তা ১৫ আগষ্টঃ অসম চৰকাৰে সীমান্তৱর্তী ৰাজ্যৰ মুখ্যমন্ত্রীৰ স’তে সৌহার্দ্যপূর্ণ আলোচনাৰ প্রয়াস অব্যাহত ৰখাৰ সময়তে অতি ৰহস্যজনকভাৱে চুবুৰীয়া ৰাজ্যসমূহেই ব্যাঘাত জন্মোৱা দেখা গৈছে৷
মন কৰিব লগা কথা যে অসমৰ স’তে চুবুৰীয়া ৰাজ্য নাগালেণ্ড, মিজোৰাম, অৰুণাচল প্রদেশ আৰু মেঘালয়ৰ সীমা সমস্যা দীর্ঘদিনীয়া৷ প্রায়ে সীমান্তৱর্তী এলেকাসমূহত অপ্রীতিকৰ ঘটনা সংঘটিত হৈ আহিছে যদিও এনে জটিল পৰিস্থিতিত কোনো সু–সমাধান নোলোৱাত নিজৰ ভূমিতেই বিনিদ্র ৰজনী কটাব লগাত পৰে অসমৰ সীমান্তবাসীয়ে৷
শনিবাৰে অসম–নাগালেণ্ড সীমান্তৱর্তী কার্বি আংলং জিলাৰ লাহৰীজানৰ সমীপৰ ডিছাপুৰবাসীক নগাই মাইকযোগে ভাবুকি প্রদান কৰাৰ ঘটনা সংঘটিত হয়৷ কার্বি আংলঙৰ দলদলি বনাঞ্চলৰ ডিছাপুৰবাসীক লক্ষ্য কৰি নগা লোকে মাইকযোগে সেই ঠাই পৰিত্যাগ কৰিবলৈ নির্দেশ দি সেয়া নাগালেণ্ডৰ ভূমি বুলি দাবী কৰে৷
লগতে সীমান্তবাসী অসমীয়াই যাতে কোনো ধৰণৰ নির্মাণকার্য সেই স্থানত নকৰে, তাৰ বাবেও নগাই মাইকযোগে আহ্বান জনাই সকীয়াই দিয়ে৷ নাগালেণ্ড চৰকাৰে ২০১৩ বর্ষত উক্ত স্থান চিহ্ণিত কৰা আছে বুলি উল্লেখ কৰি সকলোৱে সন্মান জনাব লাগে বুলি প্রকাশ কৰি এয়া নাগালেণ্ডৰ ভূমি বুলি দাবী কৰে৷
নগাই মাইকযোগে অসমৰ সীমান্তৱর্তী ডিছাপুৰবাসীক কয়– এজন এজনকৈ একচন ল’ম৷ আমি ভালকৈ আপোনালোকক বুজাই দি সমিলমিলেৰে থাকিম৷ অসম আৰক্ষী হ’লেও, আই আৰ বি এন হ’লেও, যিয়ে ইয়াত কাম কৰি আছে, আমি লিগেল একচন লম৷ নগাৰ ভাবুকিৰ পাছত সম্প্রতি তীব্র আতংকত ভুগিছে অসম–নাগালেণ্ড সীমান্তৱর্তী কার্বি আংলঙৰ ডিছাপুৰবাসী৷
জানিব পৰা মতে, কার্বি আংলঙৰ লাহৰীজান সমীপৰ দলদলি সংৰক্ষিত বনাঞ্চলৰ উক্ত অঞ্চলটোৰ বাসিন্দাসকল তীব্র আতংকত থকাৰ লগতে কার্বি আংলঙত চুবুৰীয়া ৰাজ্য নাগালেণ্ডৰ এনে কর্মকাণ্ডই ব্যাপক প্রতিক্রিয়া সৃষ্টি কৰিছে৷
উল্লেখ্য যে শনিবাৰে উক্ত এলেকাটোৰ সমীপতে নগাৰ বৃহৎ দল এটাই এটা বাঁহ–টিঙৰ গির্জা নির্মাণ কৰি থকা এটা ভিডিঅ’সহ মাইকযোগে অসমীয়াক ভাবুকি প্রদানৰ ভিডিঅ’ ভাইৰেল হৈ পৰাত উদ্বিগ্ন সীমান্তবাসী৷ ইতিমধ্যে ঘটনাস্থলীলৈ কার্বি আংলং আৰক্ষী আৰু বন বিভাগ গৈছিল যদিও পুনৰ উভতি আহে৷