নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

ৰাজ্যজুৰি বাইক ৰেলীৰে যুৱ–ছাত্রৰ প্রতিবাদ সাব্যস্ত

নিয়মীয়া বাৰ্তা ২৬ মাৰ্চঃ নাগৰিকত্ব সংশোধনী আইন (কা) বাতিলৰ দাবীত ৰাজ্যত পুনৰ প্রতিবাদী আন্দোলন আৰম্ভ কৰিছে অসম জাতীয়তাবাদী যুৱ–ছাত্র পৰিষদে৷ বিধানসভা নির্বাচনৰ অহা ২৭ মার্চত অনুষ্ঠিতব্য ভোটগ্রহণৰ পূর্বে আজি সংগঠনটোৱে ‘কা’ বাতিলৰ দাবীত ৰাজ্যজুৰি বাইক ৰেলী উলিয়ায়৷ অসম জাতীয়তাবাদী যুৱ–ছাত্র পৰিষদৰ জিলা সমিতিসমূহে সংশ্লিষ্ট জিলাৰ সদৰৰ পৰা আৰম্ভ কৰি বিভিন্ন অঞ্চললৈ এই বাইক ৰেলী উলিয়াই প্রতিবাদ সাব্যস্ত কৰে৷ কার্যসূচীৰ অন্তত সংবাদ মাধ্যমলৈ প্রেৰণ কৰা এক বিবৃতিত সংগঠনটোৰ সভাপতি ৰাণাপ্রতাপ বৰুৱা আৰু সাধাৰণ সম্পাদক পলাশ চাংমায়ে কয় যে অসমৰ ৰাইজে অসাংবিধানিক, সাম্প্রদায়িক আৰু অসমীয়া জাতিধ্বংসী ‘কা’ কোনোদিনে গ্রহণ নকৰে৷ অসম জাতীয়তাবাদী যুৱ–ছাত্র পৰিষদেও ‘কা’ বিধেয়কৰ ৰূপত থকা অৱস্থাৰ পৰাই ইয়াক বাতিলৰ দাবীত সবল প্রতিবাদ সাব্যস্ত কৰাৰ সমান্তৰালভাৱে ‘কা’ বাতিলৰ হকে মহামান্য উচ্চতম ন্যায়ালয়তো আইনী যুঁজ অব্যাহত ৰাখিছে৷

অনাগত সময়তো অসম জাতীয়তাবাদী যুৱ–ছাত্র পৰিষদে ‘কা’ বাতিলৰ দাবীত ধাৰাবাহিক আন্দোলন চলাই যাব বুলি বিবৃতিটোত স্পষ্ট কৰি দিয়া হৈছে৷ সংগঠনটোৰ নেতাদ্বয়ে কয় যে ‘কা’ৰ পৰা পৰিত্রাণ পাবলৈ অসমৰ ৰাইজে বিজেপিক উৎখাত কৰিবই লাগিব৷ ‘কা’ বলৱতৰ জৰিয়তে বিজেপিয়ে অসমত তেওঁলোকৰ স্থায়ী ভোটবেংক সৃষ্টি কৰি ৰাজভোগ স্থায়ী কৰাৰ পৰিকল্পনা কৰি অসমীয়া জাতিক নিঃশেষ কৰিব বিচাৰিছে৷ সেয়েহে সমাগত বিধানসভা নির্বাচননেই বিজেপিক উৎখাত কৰাৰ উচিত সময়৷ এই নির্বাচনত অসমৰ ৰাইজে ‘কা’ৰ বিৰুদ্ধে ভোটদান নকৰিলে ঐতিহাসিক ভুল কৰা হ’ব বুলি তেওঁলোকে মত প্রকাশ কৰে৷ ইফালে সমগ্র অসমৰ লগতে চৰাইদেউ জিলাতো আজি পৰিষদৰ চৰাইদেউ জিলা সমিতিৰ উদ্যোগত ‘কা’ বাতিলৰ দাবীত বৃহৎ বাইক ৰেলী চৰাইদেউ জিলাৰ সদৰ সোণাৰিৰ পৰা উলিওৱা হয়৷ চৰাইদেউ জিলা সমিতিৰ বাইক–চাইকেল ৰেলীত পৰিষদৰ কেন্দ্রীয় সাধাৰণ সম্পাদক পলাশ চাংমায়ে অংশগ্রহণ কৰে৷ ‘কা’বিৰোধী আৰু বিজেপিবিৰোধী বিভিন্ন শ্লোগানেৰে তিনি শতাধিক যুৱ–ছাত্র কর্মীৰ ৰেলী সোণাৰি নগৰৰ পৰা সাপেখাতী পোৱা মাত্রকে সাপেখাতী আৰক্ষী আৰু অর্ধসামৰিক বাহিনীৰ বৃহৎ দলে আগচি ধৰে৷ অৱশেষত আৰক্ষীয়ে পলাশ চাংমাই, তথ্য আৰু প্রচাৰ সম্পাদক ছাবিৰ আহমেদসহ তিনি শতাধিক যুৱ–ছাত্র কর্মীক গ্রেপ্তাৰ কৰে৷

You might also like