ফাঁচীবজাৰৰ এছ এছ ৰোডৰ পদপথত বজাৰ

নিয়মীয়া বাৰ্তা ২২ জুলাইঃ গুৱাহাটী উচ্চ ন্যায়ালয়ৰ নির্দেশনা উলংঘাৰে ফাঁচীবজাৰৰ পদপথত চলি আহিছে বজাৰ৷ ৰাজনৈতিক আশিসপুষ্ট এটা শক্তিশালী ছিণ্ডিকেট চক্রই বছৰৰ পাছত বছৰ ধৰি এছ এছ ৰোডত পদপথৰ ব্যৱসায়ীৰ পৰা ধন সংগ্রহ কৰি আহিছে৷ এই শক্তিশালী ছিণ্ডিকেট চক্রটোৱে গুৱাহাটীৰ পৌৰ নিগমৰ একাংশ অসাধু বিষয়া–কর্মচাৰীক মেনেজ কৰি ন্যায়ালয়ৰ নির্দেশনা উলংঘাৰে এছ এছ ৰোডৰ পদপথত ব্যৱসায় চলাই আহিছে৷ ফাঁচীবজাৰৰ এছ এছ ৰোডৰ পদপথৰ বজাৰ উচ্ছেদ কৰিবলৈ গুৱাহাটী উচ্চ ন্যায়ালয়ে নির্দেশনা জাৰি কৰিছিল৷ ন্যায়ালয়ৰ নির্দেশনা অনুসৰি পৌৰ কর্তৃপক্ষই ফাঁচীবজাৰৰ এছ এছ ৰোডৰ পদপথৰ ব্যৱসায়ীসকলক উচ্ছেদ কৰিছিল৷

এই ব্যৱসায়ীসকলক পৌৰ নিগম কর্তৃপক্ষই ফাঁচীবজাৰৰ জি এম চি মার্কেটলৈ স্থানান্তৰিত কৰাৰ কথা আছিল৷ ফাঁচীবজাৰৰ জি এম চি মার্কেটত এছ এছ ৰোডৰ পদপথৰ ব্যৱসায়ীসকলক স্থানান্তৰিত কৰাৰ বাবে ১৫ লক্ষাধিক টকা ব্যয়েৰে জি এম চি মার্কেটত নির্মাণকার্য চলাইছিল৷ কিন্তু আজিলৈকে ফাঁচীবজাৰৰ এছ এছ ৰোডৰ পদপথৰ ব্যৱসায়ীসকলক জি এম চি মার্কেটলৈ স্থানান্তৰিত কৰিব নোৱাৰিলে পৌৰ নিগম কর্তৃপক্ষই৷ অভিযোগ অনুসৰি জি এম চিৰ একাংশ অসাধু বিষয়া–কর্মচাৰীৰে হোৱা গোপন বুজাবুজিৰ বাবে ফাঁচীবজাৰৰ এছ এছ ৰোডৰ পদপথত আজিও চলি আছে বজাৰ৷ ৰাজনৈতিক আশিসপুষ্ট এই ছিণ্ডিকেট চক্রটোৱে এছ এছ ৰোডৰ পদপথৰ ব্যৱসায়ীৰ পৰা প্রতিদিনে সংগ্রহ কৰি আহিছে হাজাৰ হাজাৰ গুণ্ডাকৰ৷

প্রতিদিনে সংগৃহীত হোৱা বৃহৎ পৰিমাণৰ গুণ্ডাকৰৰ এটা মোটা অংক পৌৰ নিগমৰ অসাধু বিষয়া–কর্মচাৰীয়ে নিয়মীয়াকৈ লাভ কৰি আহিছে৷ ইয়াৰ উপৰি ফাঁচীবজাৰ আৰক্ষী চকীৰ একাংশ বিষয়া–কনিষ্টবলেও এই পদপথৰ ব্যৱসায়ীসকলৰ পৰা সংগ্রহ কৰি আহিছে গুণ্ডাকৰ৷ যাৰ ফলত ন্যায়ালয়ৰ নির্দেশনা উলংঘাৰে এছ এছ ৰোডৰ পদপথত ছিণ্ডিকেট চক্রটোৱে চলাই আহিছে বজাৰ৷ পৌৰ নিগম কর্তৃপক্ষই মহানগৰীৰ বিভিন্ন স্থানত পদপথত ব্যৱসায় কৰি অহা ক্ষুদ্র ব্যৱসায়ীসকলক উচ্ছেদ কৰি শক্তি প্রদর্শন কৰিছে৷ তদুপৰি পৌৰ নিগম কর্তৃপক্ষই এই পদপথৰ ব্যৱসায়ীসকলৰ বিৰুদ্ধে চলাই আহিছে উচ্ছেদ অভিযান৷ কিন্তু ৰহস্যজনক কাৰণত ন্যায়ালয়ৰ নির্দেশনাৰ পাছতো ফাঁচীবজাৰৰ এছ এছ ৰোডৰ পদপথৰ ব্যৱসায়ীসকলক উচ্ছেদ কৰা নাই৷ নৱনিযুক্ত পৌৰ আয়ুক্তই ফাঁচীবজাৰৰ এছ এছ ৰোডত ৰাজনৈতিক আশিসপুষ্ট ছিণ্ডিকেট বাহিনীয়ে চলাই অহা পদপথৰ বজাৰখন উচ্ছেদ কৰাৰ বাবে কি পদক্ষেপ গ্রহণ কৰে সেয়া লক্ষণীয় হ’ব৷