নিয়মীয়া বাৰ্তা, ১১ ছেপ্টেম্বৰঃ গুৱাহাটীৰ মালিগাঁও বৰিপাৰাস্থিত পাণ্ডু এফ আৰ ইউ হাস্পতালখন বুধবাৰে অনির্দিষ্ট কাললৈ বন্ধ কৰি দিয়া হৈছে৷ হাস্পতালখনৰ ১২জন চিকিৎসক, নার্ছ, স্বাস্থ্যকর্মী, লেবৰেটৰী টেকনিচিয়ানৰ ভিতৰত চাৰিজনৰ দেহত বুধবাৰে ৰেপিড এণ্টিজেন টেষ্ট ক’ভিডৰ উপস্থিতি পোৱাৰ পাছত হাস্পতালখন স্বাস্থ্য বিভাগে বন্ধ কৰি দিয়ে৷
চাৰিজনৰ ভিতৰত দুজন চিকিৎসক, এজনকৈ নার্ছ আৰু লেবৰেটৰী টেকনিচিয়ান৷ আটাইকেইজন বিগত কিছুদিন ধৰি জ্বৰ, কাহ, চর্দি আৰু গাৰ বিষত ভুগি আছিল৷ সম্প্রতি আটাইকেইজনকে হোম আইছ’লেচনলৈ প্রেৰণ কৰা হৈছে৷ বৃহস্পতিবাৰে নিশা স্বাস্থ্য সুস্থিৰ বুলি সহকর্মীসকলে জানিবলৈ দিছে৷ উল্লেখ্য যে যোৱা জুন মাহত গুৱাহাটী মহানগৰীৰ ক’ভিড পৰীক্ষাৰ প্রথম ৰেপিড টেষ্ট পাণ্ডু এফ আৰ ইউ চিকিৎসালয়ত স্বাস্থ্যমন্ত্রী ড০ হিমন্ত বিশ্ব শর্মাই শুভাৰম্ভ কৰিছিল৷