নিয়মীয়া বাৰ্তা, ১৩ মার্চঃ অস্কাৰ বঁটা বিজয়ী অভিনেতা টম হেংকছ আৰু তেওঁৰ অভিনেত্রী পত্নী ৰীতা উইলছন ক’ৰোনা ভাইৰাছৰ দ্বাৰা আক্রান্ত হৈছে৷ অষ্ট্রেলিয়াত হেংকছ আৰু পত্নী নতুন এই ক’ভিড–১৯ বা ক’ৰোনা ভাইৰাছৰ দ্বাৰা আক্রান্ত হোৱা বুলি সংবাদ মাধ্যমে সদৰী কৰিছে৷ অভিনেতাগৰাকীয়ে ছ’চিয়েল মিডিয়া ইনষ্টাগ্রামত নিজেই সদৰী কৰিছে এই তথ্য৷ কুইন্সলেণ্ডত দুয়োগৰাকী ক’ৰোনা ভাইৰাছৰ দ্বাৰা সংক্রমিত হোৱা বুলি অষ্ট্রেলিয়াৰ সংবাদ মাধ্যমে সদৰী কৰাৰ পিছতে বিষয়টোক লৈ বিশ্বজুৰি চর্চা চলিছে৷ আমেৰিকান এই অভিনেতা দম্পতীয়ে অষ্ট্রেলিয়াৰ গ’ল্ড কোষ্টত কেইবাদিনো ধৰি অতিবাহিত কৰিছে৷ এলভিছ প্রিছলীৰ জীৱনৰ ওপৰত নির্মাণ কৰিব লগা ছবি এখনৰ বাবে গ’ল্ড কোষ্টত বাহৰ পাতি আছে হেংকছ আৰু উইলছনে৷ স্মর্তব্য যে কালি বিশ্ব স্বাস্থ্য সংস্থাই আনুষ্ঠানিকভাৱে ক’ভিড–১৯এ বিশ্বজুৰি মহামাৰীৰ সৃষ্টি কৰিব বুলি ঘোষণা কৰিছে৷ এই ঘোষণাৰ পিছতেই বিভিন্ন দেশে ক’ভিড–১৯ৰ প্রতিৰোধৰ বাবে বিশেষ ব্যৱস্থা গ্রহণ কৰিছে৷ বর্তমানলৈ বিশ্বৰ বহু বিশিষ্ট ৰাজনীতিক, অভিনেতা তথা খেলুৱৈ ক’ৰোনাত আক্রান্ত হৈছে৷