দ্বিপাক্ষিক সম্পৰ্ক উন্নতৰ লক্ষ্যৰে কানাডা-ৰ বিদেশ মন্ত্ৰীৰে বৈঠক এছ. জয়শংকৰৰ

কানাডাৰ নায়াগ্ৰাত অনুষ্ঠিত G-7 বিদেশ মন্ত্ৰীসকলৰ বৈঠকৰ সময়ছোৱাত ভাৰতৰ বিদেশ মন্ত্ৰী ড° এছ. জয়শংকৰে কানাডাৰ বিদেশ মন্ত্ৰী অনীতা আনন্দৰ সৈতে এক গুৰুত্বপূৰ্ণ বৈঠকত মিলিত হয়। দুয়ো দেশৰ মন্ত্ৰীসকলে ভাৰত–কানাডা দ্বিপাক্ষিক সম্পৰ্ক আৰু সহযোগিতা অধিক মজবুত কৰাৰ আশা প্ৰকাশ কৰে। জয়শঙ্কৰে সামাজিক মাধ্যম এক (পূৰ্বে টুইটাৰ) ত এক বাৰ্তাত কয়, “G-7 বৈঠকৰ সফল আয়োজনৰ বাবে অনীতা আনন্দক অভিনন্দন জনালোঁ। নতুন ‘Roadmap 2025’ৰ সফল কাৰ্যান্বয়নৰ বাবে কৰা প্ৰচেষ্টাক আমি প্ৰশংসা কৰিছো। আমাৰ দ্বিপাক্ষিক সম্পৰ্ক আৰু দৃঢ় হোৱাৰ আশাবাদী।”

অনীতা আনন্দে নিজেও Xত লিখে যে তেওঁলোকে ব্যৱসায়, শক্তি, নিৰাপত্তা আৰু জনগণৰ মাজৰ সংযোগ মজবুত কৰাৰ বিষয়ত বিস্তৃত আলোচনা কৰিছে।

ভাৰতীয় বিদেশ মন্ত্রালয়ে জনায়, “G-7 বৈঠকৰ অংশগ্ৰহণৰ জৰিয়তে ভাৰত বিশ্বজুৰি থকা চেলেঞ্জসমূহৰ সমাধান আৰু Global South দেশসমূহৰ কণ্ঠ শক্তিশালী কৰাৰ প্ৰতিশ্ৰুতি পূৰ্ণভাৱে পালন কৰি আহিছে।”

কানাডাই এই G-7 বৈঠকত ভাৰতৰ উপৰি অষ্ট্ৰেলিয়া, ব্ৰাজিল, ছৌদি আৰব, মেক্সিকো, দক্ষিণ কোৰিয়া, দক্ষিণ আফ্ৰিকা আৰু ইউক্ৰেইনক নিমন্ত্ৰণ জনাইছে। বৈঠকত সাগৰীয় সুৰক্ষা, শক্তি নিৰাপত্তা, অৰ্থনৈতিক স্থিতিশীলতা আৰু মূল্যবান খনিজ সম্পদৰ ওপৰত মূলত আলোচনা হয়।

ড° জয়শংকৰৰ এই কানাডা ভ্ৰমণ অনীতা আনন্দৰ এক মাহ আগৰ ভাৰত ভ্ৰমণৰ পিছত অনুষ্ঠিত হৈছে। সেই সময়ত দুয়ো দেশেই ব্যৱসায়, শক্তি আৰু খনিজ সম্পদৰ ক্ষেত্ৰত সহযোগিতা বঢ়াবলৈ এক উদ্যমী Roadmap উন্মোচন কৰিছিল।

বৈঠকৰ অন্তত দুয়ো বিদেশ মন্ত্ৰীয়ে দ্বিপাক্ষিক বাণিজ্য আৰু বিনিয়োগ সম্পৰ্কে শীঘ্ৰে মন্ত্ৰীস্তৰীয় আলোচনা আৰম্ভ কৰিবলৈ একমত হয়।

ডিজিটেল ডেস্ক, ১২ নৱেম্বৰ