মই এজন অপহৃত ৰাষ্ট্ৰপতি… আমেৰিকাৰ অভিযোগ নাকচ মাদুৰোৰ

ভেনিজুৱেলাৰ ৰাষ্ট্ৰপতি নিকোলাছ মাদুৰোৱে আমেৰিকাৰ এখন আদালতৰ সন্মুখত নিজকে নিৰ্দোষী বুলি দাবী কৰি কয় যে তেওঁ এজন যুদ্ধবন্দী। আমেৰিকাই তেওঁক গ্ৰেপ্তাৰ কৰি নাৰ্কোটিকছ-সংলগ্ন সন্ত্ৰাসবাদৰ গোচৰত বিচাৰৰ বাবে নিউয়ৰ্কলৈ লৈ আহিছে। সোমবাৰে কটকটীয়া নিৰাপত্তাৰ মাজত তেওঁক প্ৰথমবাৰৰ বাবে আদালতত হাজিৰ কৰোৱা হয়। শুনানিৰ সময়ত দোভাষী জৰিয়তে তেওঁ কয়, “মই অপহৃত এজন ৰাষ্ট্ৰপতি। মই এজন যুদ্ধবন্দী।”

শনিবাৰে আমেৰিকাৰ ডেল্টা ফ’ৰ্চৰ জোৱানসকলে এটা সুনিৰ্দিষ্ট সামৰিক অভিযান চলাই ভেনিজুৱেলাৰ এটা সামৰিক ঘাটিৰ পৰা মাদুৰো আৰু তেওঁৰ পত্নী চিলিয়া ফ্লোৰেছক আটক কৰি বিমানযোগে নিউয়ৰ্কলৈ লৈ আহে। আদালতত হোৱা এই শুনানি আনুষ্ঠানিক আছিল। এই সময়ছোৱাত মাদুৰো আৰু তেওঁৰ পত্নীয়ে দুয়োৱে ২৫ পৃষ্ঠাৰ অভিযোগনামাত উত্থাপিত সকলো অভিযোগ নাকচ কৰি নিজকে নিৰ্দোষী বুলি দাবী কৰে।

মাদুৰোৱে কয়, “মই নিৰ্দোষী। মই কোনো অপৰাধ কৰা নাই। মই এজন সভ্য ব্যক্তি আৰু আজিও মই মোৰ দেশৰ ৰাষ্ট্ৰপতি।” চিলিয়া ফ্লোৰেছেও আদালতত কয়, “মই ভেনিজুৱেলা গণৰাজ্যৰ প্ৰথম মহিলা।” মাদুৰোৱে নিজৰ অপহৰণৰ কথা ক’বলৈ আৰম্ভ কৰোঁতেই ন্যায়াধীশে তেওঁক বাধা দি কয় যে আদালতৰ সন্মুখত তেওঁ মাত্ৰ নিজৰ পৰিচয়হে দিব লাগিব।

মাদুৰোৰ অধিবক্তাই আদালতত কয় যে এজন দেশৰ ৰাষ্ট্ৰপতিক গ্ৰেপ্তাৰ কৰা আইনগত নে নহয়, সেই প্ৰশ্ন উত্থাপন কৰিব পৰা যায়। লগতে তেওঁ সামৰিক পদ্ধতিত তেওঁক ধৰা কিমান বৈধ আছিল সেই বিষয়টোও প্ৰশ্ন তুলিব পাৰে বুলি কয়। আনফালে আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু বৈদেশিক মন্ত্ৰীয়ে কয় যে মাদুৰোক লৈ অহাৰ এই অভিযান এটা আইন প্ৰয়োগ প্ৰক্ৰিয়া আছিল, কোনো যুদ্ধ নহয়।

মাদুৰো আৰু ফ্লোৰেছক এটা ফেডাৰেল জিম্মাত ৰখা হৈছে, যাৰ অৱস্থা সম্পৰ্কে নিজে ন্যায়াধীশেও আগতে সমালোচনা কৰিছিল। এক সময়ত কঠোৰ শাসক হিচাপে পৰিচিত মাদুৰো এতিয়া এজন সাধাৰণ বন্দীৰ দৰে দেখা গৈছিল। তেওঁ সাধাৰণ কাপোৰ পিন্ধি আছিল আৰু তেওঁৰ সৈতে নিৰাপত্তা কৰ্মী আছিল। আদালত কক্ষত প্ৰৱেশ কৰাৰ সময়ত আমেৰিকান মাৰ্শ্বালসকলৰ মাজত থকাৰ অৱস্থাত মাদুৰোৱে স্পেনিছ ভাষাত “বুয়েনাছ দিয়াছ”, অৰ্থাৎ “শুভ দিন” বুলি সকলোকে সম্ভাষণ জনায়।

চিলিয়া ফ্লোৰেছৰ কপালত বেণ্ডেজ বন্ধা আছিল। তেওঁৰ অধিবক্তাই জনায় যে আমেৰিকান বাহিনীৰ দ্বাৰা আটক কৰাৰ সময়ত তেওঁ আঘাত পাইছিল আৰু তেওঁৰ কিছু আঘাত পোৱাৰ সম্ভাৱনা আছে। মাদুৰো আৰু ফ্লোৰেছৰ বিৰুদ্ধে মুখ্য অভিযোগসমূহৰ ভিতৰত নাৰ্কো-টেৰ’ৰিজমৰ ষড়যন্ত্ৰ অন্যতম, য’ত ভেনিজুৱেলাৰ সেনা আৰু গোপন সংস্থাসমূহ ব্যৱহাৰ কৰি কোকেইনৰ চালান আমেৰিকালৈ সৰবৰাহ কৰাৰ অভিযোগ আছে। এই কাৰণেই তেওঁলোকৰ বিৰুদ্ধে নিচা-সম্পৰ্কীয় সন্ত্ৰাসবাদৰ ষড়যন্ত্ৰৰ অভিযোগ উত্থাপন কৰা হৈছে।

এই অভিযোগসমূহ শক্তিশালী কৰিবলৈ মাদুৰোৰ বিৰুদ্ধে মেচিনগান আৰু বিপজ্জনক অস্ত্ৰ ৰখাৰ অভিযোগো আৰোপ কৰা হৈছে। ইয়াৰ উপৰি ক’লম্বিয়াৰ সন্ত্ৰাসবাদী সংগঠনসমূহৰ সৈতে সহযোগ কৰাৰ অভিযোগো তেওঁৰ বিৰুদ্ধে আছে। মাদুৰোৰ বিৰুদ্ধে উত্থাপিত কিছুমান অভিযোগত দোষী সাব্যস্ত হ’লে মৃত্যুদণ্ডলৈকে হ’ব পাৰে।

নিচা ব্যৱসায়ৰ ধন ইফাল-সিফাল কৰাৰ অভিযোগত মাদুৰোৰ বিৰুদ্ধে মনী লণ্ডাৰিং গোচৰো ৰুজু কৰা হৈছে। চিলিয়া ফ্লোৰেছৰ বিৰুদ্ধে নিচা সৰবৰাহকাৰী গোটসমূহৰ সৈতে জড়িত ঘোচ লোৱাৰ অভিযোগো উত্থাপন কৰা হৈছে।

ডিজিটেল ডেস্ক, ৬ জানুৱাৰী

লগতে এইটোও পঢ়ক —- নিশা শোৱাপাটীৰ পৰাই উঠাই আনিছিল ভেনিজুৱেলাৰ ৰাষ্ট্রপতিক