নিয়মীয়া বাৰ্তা,১০ ফেব্ৰুৱাৰীঃ কাশ্মীৰী পণ্ডিতৰ দুর্দশা আৰু গণপ্রব্রজনক লৈ বিধু বিনোদ চোপ্রাৰ নৱতম ছবি ‘ছিকাৰা’ উপভোগ কৰি আৱেগিক হৈ পৰা দেখা গ’ল জ্যেষ্ঠ বিজেপি নেতা এল কে আদৱানিক ৷ ছবিখনৰ বিশেষ প্রদর্শনী উপভোগৰ সময়ত আদৱানিৰ দুচকুৰে অশ্রু নিগৰি অহাৰ এটি ভিডিঅ’ ছ’চিয়েল মিডিয়াত আপলোড কৰিছে ছিকাৰা ছবিৰ পৰিচালক বিধু বিনোদ চোপ্রাই ৷ ‘ছিকাৰাৰ বিশেষ প্রদর্শনীত উপস্থিত থাকি এল কে আদৱানিয়ে আমাক ধন্য কৰিলে ৷ আপোনাৰ আশীর্বাদ আৰু প্রশংসাৰ বাবে আমি নিজকে ধন্য অনুভৱ কৰিছোঁ ৷’ ৪৮ ছেকেণ্ডৰ ভিডিঅ’টোৰ সৈতে পৰিচালকগৰাকীয়ে ছ’চিয়েল মিডিয়াত এই কথা উল্লেখ কৰে ৷ মন কৰিবলগীয়া যে যোৱা ৭ ফেব্রুৱাৰীত ছবিগৃহলৈ অহা ‘ছিকাৰা’ ছবিখনে প্রথম দুদিনতে ৩.০৫ কোটি উপার্জন কৰে ৷ টাইটানিকৰ পৰিচালক জেমছ কেমেৰুন আৰু বলীউডৰ তাৰকা আমিৰ খানেও ছবিখনক প্রশংসাৰে ওপচাই পেলাইছে ৷