নিয়মীয়া বাৰ্তা, ২৯ মাৰ্চঃ কাশ্মীৰৰ শ্ৰীনগৰৰ জৱাহৰলাল নেহৰু মেমৰিয়েল চিকিৎসালয়ত দেওবাৰে তাণ্ডৱ চলাই একাংশ ৰোগীৰ আত্মীয়ই । এই তাণ্ডৱৰ পাচতেই ৰণক্ষেত্ৰত পৰিণত হয় চিকিৎসালয়খন । ঘটনাৰ সুযোগ বুজি চিকিৎসালয়ৰ আইছুলেচন ৱাৰ্ডৰ পৰা পলায়ন কৰে ২৬ জনকৈ সন্দেহজনক ক’ৰোনা আক্ৰান্ত । ২৬ জনৰ শৰীৰত ক’ৰোনা ভাইৰাছৰ অৱস্থিতিৰ আশংকা কৰিয়ে চিকিৎসকে বিগত কিছুদিন ধৰি আইছুলেচন ৱাৰ্ডত ৰাখিছিল ।
এই ২৬ জন ৰোগীয়ে পলায়ন কৰাৰ পাচতেই এতিয়া সমগ্ৰ কাশ্মীৰত ক’ৰোনা ভাইৰাছ বিয়পি পৰাৰ আশংকা কৰিছে প্ৰশাসনে । ২৬ জনৰ ১ জন অথবা ২ জনৰ শৰীৰত ক’ৰোনা পজিটিভ পালেও সমগ্ৰ কাশ্মীৰৰ বাবে নামি আহিব বিপদ ।
বিগত কিছুদিন ধৰি জৱাহৰলাল নেহৰু মেমৰিয়েল চিকিৎসালয়খনত ৰোগীৰ ভিৰ বাঢ়িছিল । ৰোগীৰ আত্মীয়ৰ অভিযোগ যে চৰম অৱস্থাৰ মাজেৰে চলিছে চিকিৎসালয়খন, যাৰ ফল ভোগ কৰিব লগা হৈছে ৰোগীয়ে । ফলত দেওবাৰে ৰোগীৰ আত্মীয়ই এই কাৰ্যৰ বিক্ষোভ কৰাৰ পাচতেই ৰণক্ষেত্ৰলৈ পৰিণত হয় চিকিৎসালয়খন ।
উল্লেখ্য যে, বৰ্তমানলৈকে জম্মু কাশ্মীৰত ৩৩ জন লোক আক্ৰান্ত হৈছে ক’ৰোনাত । ৬৭ বছৰীয়া এগৰাকী বৃদ্ধাই মৃত্যুক সাৱটি ল’বলগীয়াৰ দৰে ঘটনাও সংঘটিত হৈছে ৰাজ্যখনত । ইয়াৰ পাচতেই এতিয়া চিকিৎসালয়ৰ পৰা পলাই যোৱা এই ২৬ গৰাকী ৰোগীক লৈ চিন্তিত হৈ পৰিছে চিকিৎসালয় কৰ্তৃপক্ষৰ লগতে সাধাৰণজন ।