জম্মু-কাশ্মীৰৰ উধামপুৰ জিলাত সংঘটিত হৈছে এক ভয়াৱহ বাছ দুৰ্ঘটনা। উধামপুৰৰ ৰামনগৰৰ কাগোট অঞ্চলত এখন যাত্ৰীবাহী বাছ ওলটাই যোৱাত এই কৰুণ দুৰ্ঘটনাত অন্ততঃ ১২জন লোকৰ মৃত্যুৰ খবৰ পোৱা গৈছে।
দুৰ্ঘটনাৰ পাছতেই ঘটনাস্থলীত উদ্ধাৰ অভিযান অব্যাহত আছে। আৰক্ষী, প্ৰশাসন আৰু স্থানীয় লোকসকলে মিলি উদ্ধাৰ কাৰ্যত সহায় কৰি আছে। ইফালে আহতসকলক ওচৰৰ বিভিন্ন চিকিৎসালয়ত ভৰ্তি কৰোৱা হৈছে।
আৰক্ষীৰ তথ্য অনুসৰি, বাছখন ৰামনগৰৰ পৰা উধমপুৰ অভিমুখে গৈ আছিল। সেই সময়তে জালো অঞ্চলৰ ওচৰত হঠাৎ এই দুৰ্ঘটনাটো সংঘটিত হয়। বৰ্তমানলৈকে দুৰ্ঘটনাৰ প্ৰকৃত কাৰণ স্পষ্ট হোৱা নাই আৰু সমগ্ৰ ঘটনাটোৰ তদন্ত অব্যাহত আছে।
ঘটনাৰ খবৰ পোৱাৰ লগে লগে আৰক্ষী আৰু স্থানীয় প্ৰশাসনৰ দল ঘটনাস্থলীত উপস্থিত হৈ তৎক্ষণাত উদ্ধাৰ আৰু সহায় অভিযান আৰম্ভ কৰে। উদ্ধাৰকাৰী দলে আহতসকলক শীঘ্ৰে ওচৰৰ চিকিৎসালয় আৰু স্বাস্থ্য কেন্দ্ৰসমূহলৈ প্ৰেৰণ কৰিছে। প্ৰশাসনে জনোৱা মতে, আহতসকলৰ অৱস্থাৰ ওপৰত নজৰ ৰখা হৈছে আৰু তেওঁলোকক সম্ভৱ সকলো চিকিৎসা সহায় আগবঢ়োৱা হৈছে। দুৰ্ঘটনাৰ কাৰণ সন্দৰ্ভত অধিক তথ্যৰ বাবে অপেক্ষা কৰা হৈছে।
এই মৰ্মান্তিক দুৰ্ঘটনাত জম্মু-কাশ্মীৰৰ মুখ্যমন্ত্ৰী ওমৰ আব্দুল্লাই গভীৰ শোক প্ৰকাশ কৰিছে। মুখ্যমন্ত্ৰী কাৰ্যালয়ৰ তথ্য অনুসৰি, তেওঁ ৰামনগৰৰ পৰা উধামপুৰলৈ গৈ থকা যাত্ৰীবাহী বাছৰ সৈতে সংঘটিত এই দুৰ্ঘটনাত নিহতসকলৰ পৰিয়াললৈ গভীৰ সমবেদনা জ্ঞাপন কৰিছে আৰু আহতসকলৰ শীঘ্ৰ আৰোগ্য কামনা কৰিছে। লগতে এই দুখৰ সময়ত চৰকাৰ ভুক্তভোগী পৰিয়ালসমূহৰ সৈতে দৃঢ়ভাৱে থিয় হৈ থকাৰ আশ্বাসো দিছে।
ইফালে জম্মু-কাশ্মীৰৰ প্ৰাক্তন মুখ্যমন্ত্ৰী মেহবুবা মুফতিয়েও এই দুৰ্ঘটনাত শোক প্ৰকাশ কৰিছে। তেওঁ সামাজিক মাধ্যমত প্ৰকাশ কৰা এক বাৰ্তাত কয় যে, “উধামপুৰ-ৰামনগৰ বাছ দুৰ্ঘটনাত ১২জন লোকৰ মৃত্যু হোৱা ঘটনাই মোক গভীৰভাৱে ব্যথিত কৰিছে। নিহতসকলৰ পৰিয়াললৈ মোৰ সমবেদনা আৰু আহতসকলৰ শীঘ্ৰ আৰোগ্য কামনা কৰিছোঁ।”
একেদৰে জম্মু-কাশ্মীৰৰ উপ-ৰাজ্যপাল মনোজ সিন্হাই এই ঘটনাক হৃদয়বিদাৰক বুলি অভিহিত কৰি নিহতসকলৰ পৰিয়াললৈ গভীৰ সমবেদনা জ্ঞাপন কৰে। তেওঁ জিলা প্ৰশাসন, আৰক্ষী, SDRF আৰু স্বাস্থ্য বিভাগক ক্ষতিগ্ৰস্তসকলক সকলো ধৰণৰ সহায় আগবঢ়াবলৈ নিৰ্দেশ দিয়া বুলি জানিবলৈ দিয়ে।
ডিজিটেল ডেস্ক, ২০ এপ্ৰিল