নিয়মীয়া বাৰ্তা ২৭ জুলাইঃ সংঘর্ষজর্জৰ আফগানিস্তানত চলিত বর্ষৰ প্রথম ৬টা মাহত অভিলেখসংখ্যক লোক নিহত বা আহত হৈছে৷ ৰাষ্ট্রসংঘৰ শেহতীয়া প্রতিবেদনত প্রকাশ পাইছে এই তথ্য৷ চলিত বর্ষৰ প্রথম ৬টা মাহত ১৬০০তকৈ অধিক অসামৰিক লোক নিহত হৈছে তালিবানৰ আক্রমণত৷ বিগত বর্ষৰ তুলনাত ৪৭ শতাংশ অধিক লোকৰ মৃত্যু হৈছে এই সময়ছোৱাত৷
স্মর্তব্য যে তালিবানে আফগানিস্তানৰ ন ন অঞ্চল শেহতীয়াকৈ দখল কৰিছে৷ আমেৰিকান আৰু নাটো বাহিনীৰ প্রত্যাৱর্তন প্রক্রিয়া আৰম্ভ হোৱাৰ লগে লগে তালিবানে আক্রমণ তীব্রতৰ কৰি তোলা পৰিলক্ষিত হৈছে৷ ইতিমধ্যে কেইবাখনো গুৰুত্বপূর্ণ চহৰ বিগত কেইসপ্তাহমানৰ ভিতৰত তালিবানৰ হাতলৈ গৈছে৷ শেহতীয়াকৈ ৪৬জন আফগান সৈনিকে সীমান্তৰ এক চকী তালিবানৰ হাতত হেৰুৱাই প্রতিৱেশী পাকিস্তানত আশ্রয় লোৱা বুলি দেশখনৰ সংবাদ মাধ্যমে সদৰী কৰিছে৷ তালিবানে দাবী কৰা অনুসৰি বহু আফগান সৈনিকে তাজিকিস্তান আৰু ইৰানলৈও পলায়ন কৰিছে৷