নিয়মীয়া বাৰ্তা,৬ জুনঃ পয়গম্বৰ হজৰত মহম্মদক লৈ বিতর্কিত মন্তব্য কৰি নিলম্বিত হ’বলগীয়া হ’ল বিজেপিৰ মুখপাত্র নূপুৰ শর্মা৷ আজি বিজেপিৰ পদৰ পৰা নূপুৰ শর্মা আৰু নবীন জিন্দালক অপসাৰণ কৰিছে দলৰ নেতৃত্বই৷ বিজেপিৰ তৰফৰ পৰা উল্লেখ কৰা হৈছে দলৰ প্রাথমিক সদস্য পদৰ পৰা নিলম্বন কৰা হৈছে দুয়োগৰাকী মুখপাত্রক৷
স্মর্তব্য যে মাত্র কেইদিনমান পূর্বে হজৰত মহম্মদক লৈ বিতর্কিত মন্তব্য কৰিছিল বিজেপি নেত্রী নূপুৰ শর্মাই৷ নূপুৰ শর্মাৰ এই মন্তব্যক কেন্দ্র কৰি উত্তপ্ত হয় কাণপুৰ৷ কাণপুৰ অঞ্চলত শিলগুটি দলিওৱা, দোকান তথা অন্যান্য প্রতিষ্ঠান ভঙা আদি বিভিন্ন অপ্রীতিকৰ ঘটনা সংঘটিত হয়৷ এই সংঘর্ষত জড়িত ১৮জন লোকক গ্রেপ্তাৰো কৰা হৈছে৷
বিজেপিৰ তৰফৰ পৰা এক বিবৃতিত উল্লেখ কৰা হৈছে যে কোনো ধর্ম বা ধর্মীয় ব্যক্তিৰ প্রতি অসন্মানজনক মন্তব্যৰ পক্ষপাতী নহয় দল৷ অৱশ্যে দলটোৱে এই সন্দর্ভত কোনো বিশেষ ঘটনাৰ কথা উল্লেখ কৰা নাই৷ কিন্তু এই বিবৃতি প্রকাশ কৰাৰ কিছু সময় পিছতেই দলৰ প্রাথমিক সদস্য পদৰ পৰা নূপুৰ শর্মা আৰু নবীন জিন্দালক নিলম্বন কৰা বুলি ঘোষণা কৰা হয়৷