নিয়মীয়া বাৰ্তা, ২৩ নৱেম্বৰঃ যোৱা ১৯ নৱেম্বৰত জম্মু–কাশ্মীৰত নাগ্র’তাৰ সংঘর্ষত নিহত চাৰি জইছ–ই–মহম্মদ (জেইএম) সন্ত্রাসবাদীক লৈ ন ন তথ্য লাভ কৰিছে চোৰাংচোৱা সংস্থাসমূহে৷ উল্লেখনীয় যে জে ই এমৰ এই সন্ত্রাসবাদীকেইটাই কমাণ্ডোৰ প্রশিক্ষণ লাভ কৰিছিল৷ ২০১৬ৰ পাঠানকোট বিমানঘাটি আক্রমণত জড়িত কাছিম জান আছিল নাগ্র’তাৰ সন্ত্রাসবাদী সংঘর্ষৰো মূল খলনায়ক৷
দক্ষিণ কাশ্মীৰত আত্মগোপনকাৰী কর্মীৰ সৈতে কাছিমৰ আছিল সম্পর্ক৷ লক্ষণীয়ভাৱে ৰাষ্ট্রসংঘৰ দ্বাৰা গোলকীয় সন্ত্রাসবাদী হিচাপে তালিকাভুক্ত হোৱা মুফতি ৰৌফ আছগৰে নাগ্র’তালৈ অহা এই সন্ত্রাসবাদীকেইটাৰ কাম–কাজ নিৰীক্ষণ কৰিছিল৷ এই সন্ত্রাসবাদীকেইটাই ভাৰতত প্রৱেশ কৰিবলৈ ৩০ কিলোমিটাৰ খোজকাঢ়ি আহিছিল অন্ধকাৰৰ সুযোগ লৈ৷
সন্ত্রাসবাদীকেইটা নিহত হোৱাৰ লগে লগে পাঠানকোট সদৃশ আক্রমণৰ পৰা ৰক্ষা পৰিছিল সমগ্র কাশ্মীৰ উপত্যকা৷ শেহতীয়াকৈ চোৰাংচোৱাই সদৰী কৰা অনুসৰি দুই শতাধিক সন্ত্রাসবাদীয়ে নিয়ন্ত্রণ ৰেখাৰ সমীপত পাক লাঞ্চ পেডত অপেক্ষা কৰি আছে৷ সুযোগ পালেই এই সন্ত্রাসবাদীবোৰে ভাৰতত প্রৱেশ কৰি কূটাঘাত সংঘটিত কৰিব৷