নিয়মীয়া বাৰ্তা, ২২ মাৰ্চঃ ক’ভিড–১৯ত আক্রান্ত হোৱা পাকিস্তানী প্রধানমন্ত্রী ইমৰান খানৰ আশু আৰোগ্য কামনা কৰিছে ভাৰতৰ প্রধানমন্ত্রী নৰেন্দ্র মোদীয়ে৷ উল্লেখনীয় যে চীনে প্রস্তুত কৰা ক’ভিড ভেকচিন ‘ছাইন’ভেক’ গ্রহণ কৰাৰ মাত্র দুদিন পিছত ক’ভিডত আক্রান্ত হয় পাক প্রধানমন্ত্রীগৰাকী৷
ভাৰতৰ প্রধানমন্ত্রী নৰেন্দ্র মোদীয়ে ছ’চিয়েল মিডিয়া টুইটাৰযোগে ইমৰান খানৰ আশু আৰোগ্য কামনা কৰা বিষয়টোক লৈ সংবাদ মাধ্যমত চর্চা চলিছে৷ লক্ষণীয়ভাৱে ইমৰান খানে ১৮ মার্চত ক’ভিড ভেকচিন গ্রহণ কৰি দেশবাসীক এই ভেকচিন লোৱাৰ বাবে আহ্বান জনাইছিল৷ আনকি ছাইন’ভেক ভেকচিন সকলো ফালৰ পৰা নিৰাপদ বুলিও ইমৰান খানে ঘোষণা কৰিছিল৷
ক’ভিড–১৯ মহামাৰীৰ সংক্রমণ প্রতিৰোধৰ বাবে এই ভেকচিন সকলোৱে গ্রহণ কৰাটো জৰুৰী বুলি উল্লেখ কৰিছিল প্রধানমন্ত্রী ইমৰান খানে৷ স্মর্তব্য যে পাকিস্তানত শেহতীয়াকৈ ক’ভিড–১৯ মহামাৰীৰ দ্রুত সংক্রমণ ঘটিছে৷ মাজত তিনিটা মাহত সংক্রমণ কিছু হ্রাস পাইছিল যদিও যোৱা ফেব্রুৱাৰী মাহৰ পৰা চহৰবোৰত ক’ভিডত আক্রান্ত হৈছে হাজাৰ হাজাৰ লোক৷ ক’ভিডৰ এই দ্রুত সংক্রমণক লৈ উদ্বিগ্ণ হৈ পৰিছে ইমৰান খান চৰকাৰ৷