নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

পেগাছাছৰ ফোন টেপিঙক লৈ উত্তাল সংসদ

উভয় সদনৰ কাম–কাজ ব্যাহতঃ বিৰোধীক কঠোৰ সমালোচনা প্রধানমন্ত্রীৰ

নিয়মীয়া বাৰ্তা ২১ জুলাইঃ ইজৰাইলী চোৰাংচোৱা প্রযুক্তি পেগাছাছে দেশৰ বহু ৰাজনীতিক, সাংবাদিক, ব্যৱসায়ী তথা বিশিষ্ট ব্যক্তিৰ ফোন টেপিং কৰাৰ অভিযোগত চৰকাৰৰ বিৰুদ্ধে আজি সৰৱ হয় বিৰোধী৷ পেগাছাছৰ ফোন টেপিঙৰ ক্ষেত্রত চৰকাৰৰ পৰা উত্তৰ বিচাৰি বিৰোধীয়ে হুলস্থূলীয়া পৰিস্থিতি সৃষ্টি কৰাৰ ফলত সংসদৰ বর্ষাকালীন অধিৱেশনৰ দ্বিতীয় দিনাৰ কাম–কাজো ব্যাহত হৈ পৰে৷ দ্বিতীয় দিনা উভয় সদনৰ কাম–কাজ বন্ধ ৰাখিবলগীয়া হয় কংগ্রেছসহ বিৰোধী সাংসদসমূহৰ তীব্র আপত্তিৰ বাবে৷

উল্লেখনীয় যে ইজৰাইলী প্রতিষ্ঠান এনএছ’ৰ তৰফৰ পৰা পেগাছাছ ক্রয় কৰিছে ভাৰতসহ বিশ্বৰ বিভিন্ন দেশে৷ বিৰোধীৰ এক হুলস্থূলৰ মাজতে প্রধানমন্ত্রী মোদীয়ে কংগ্রেছৰ মিথ্যাচাৰৰ বিৰুদ্ধে বিজেপি সাংসদসকলক সত্য তথা ভাল কামৰ জৰিয়তে প্রত্যুত্তৰ দিবলৈ আহ্বান জনাইছে৷ কংগ্রেছসহ বিৰোধীয়ে চৰকাৰৰ বিৰুদ্ধে গভীৰ ষড়যন্ত্র চলোৱা বুলি আক্ষেপ প্রকাশ কৰি প্রধানমন্ত্রীগৰাকীয়্ কয় যে জনসাধাৰণৰ কল্যাণ তেওঁলোকে নিবিচাৰে৷

ইফালে, পেগাছাছ বিষয়টোক লৈ লোকসভা আৰু ৰাজ্যসভাৰ কাম–কাজ ব্যাহত হৈ পৰাৰ পিছত কংগ্রেছে বিষয়টোক লৈ যৌথ সংসদীয় কমিটীৰ তদন্তৰ দাবী কৰিছে৷ লক্ষণীয়ভাৱে মঙলবাৰে পাঁচ বজাত ক’ভিড–১৯ সন্দর্ভত চৰকাৰে বিৰোধী পক্ষক সকলো প্রশ্ণৰ উত্তৰ দিয়াৰ সিদ্ধান্ত লয়৷ ভাৰতত এই বিষয়টোক লৈ উত্তাল পৰিস্থিতি চলি থকাৰ সময়তে ইজৰাইলী প্রতিষ্ঠান এনএছ’ই স্পষ্টীকৰণ দি কৈছে যে প্রতিষ্ঠানটোৱে মাত্র চৰকাৰক পেগাছাছ ছফ্টৱেৰ যোগান ধৰি আছে৷ বাকী কাম–কাজত সংস্থাটোৰ হাত নাই৷

You might also like