ডিজিটেল ডেস্ক, ১৩ নৱেম্বৰ : দিল্লীৰ লালকিল্লাৰ সমীপত সংঘটিত ভয়ংকৰ বিস্ফোৰণত ব্যৱহাৰ হোৱা হুণ্ডাই I20 গাড়ীখনৰ চালকৰ আসনত উমৰ উন-নবীয়ে আছিল। শেহতীয়াকৈ ডি এন এ পৰীক্ষাত এই কথাৰ প্ৰমাণ ওলাইছে। তদন্তকাৰীৰ সূত্ৰ অনুসৰি ঘটনাস্থলীৰ পৰা উদ্ধাৰ হোৱা উমৰৰ শৰীৰৰ অংগ আৰু কাশ্মীৰৰ পুলৱামাত থকা মাতৃ আৰু ভাতৃৰ ডি এন এ পৰীক্ষা সম্পন্ন কৰা হৈছিল। পৰীক্ষাত ডি এন এ ১০০ শতাংশ মিলা বুলি খবৰ পোহৰলৈ আহিছে।
দিল্লীৰ লালকিল্লাৰ সমীপত সংঘটিত বিস্ফোৰণত ব্যৱহৃত ঘাতক গাড়ীখনৰ নম্বৰ আছিল HR-26 CE-7674। উল্লেখ্য যে ২০১৪ চনৰ ১৮ মাৰ্চত গাড়ীখন ছলমান নামৰ যুৱক এজনে কিনিছিল। এনেকৈ চাৰিবাৰ গাড়ীখন ক্ৰয়-বিক্ৰয়ৰ পিছত গাড়ীখন তাৰিকলৈ যায়। কিন্তু গাড়ীখনৰ পঞ্জীয়নৰ প্ৰমাণ পত্ৰত কোনো পৰিৱৰ্তন হোৱা নাছিল। তাৰ পাছত গাড়ীখনৰ মালিকীস্বত্ব উমৰৰ হাতলৈ যায়। বিস্ফোৰণৰ পূৰ্বে তেওঁৰ ছবি চি চি টিভিৰ ফুটেজত দেখা গৈছিল।
জানিব পৰা মতে, গাড়ীখন চুনহেৰী মছজিদৰ পৰা ৰেড ফ’ৰ্ট মেট্ৰ’ ষ্টেচনলৈ লৈ গৈ বিস্ফোৰণ ঘটায়। তদন্তকাৰীয়ে প্ৰথমে জানিব পাৰিছে যে উমৰে দুজন সহযোগীৰ সৈতে আত্মঘাতী আক্ৰমণৰ পৰিকল্পনা কৰিছিল। তদন্তকাৰীয়ে অনুমান কৰিছে যে সোমবাৰে কেইবাটাও অঞ্চলত বৃহৎ পৰিমাণৰ বিস্ফোৰক উদ্ধাৰ হোৱাৰ পিছত আৰু সন্দেহযুক্ত লোকক গ্ৰেপ্তাৰ কৰাৰ আশংকাত উমৰে খৰখেদাকৈ বিস্ফোৰণটো সংঘটিত কৰে।
বুধবাৰে তদন্তকাৰীয়ে উমৰৰ আন এখন ৰঙা ৰঙৰ ফৰ্ড বাহনৰ তথ্য লাভ কৰে। জানিব পৰা মতে, ২০১৭ চনত দিল্লীৰ ৰাজৌৰী গাৰ্ডেনত উমৰৰ নামত পঞ্জীয়ন কৰা গাড়ীখনৰ উমৰ দ্বিতীয়জন মালিক। ভুৱা ঠিকনা ব্যৱহাৰ কৰি বাহনখন ক্ৰয় কৰিছিল। তদন্তকাৰীয়ে সন্দেহ কৰিছে যে উমৰে এই ফৰ্ডখনক আক্ৰমণৰ বাবে দ্বিতীয়খন বাহন হিচাপে ব্যৱহাৰ কৰাৰ পৰিকল্পনা কৰিছিল। সোমবাৰে সংঘটিত হোৱা বিস্ফোৰণৰ পিছৰে পৰা সন্ধান ওলোৱা নাই ৰঙা ৰঙৰ বাহনখনৰ। এই বাহনখনৰ সন্ধানতো অভিযান আৰম্ভ কৰা হৈছে।
ইফালে, দিল্লী বিস্ফোৰণত উমৰ জড়িত হৈ পৰাত উমৰৰ পৰিয়াল ভাগি পৰিছে। পুলৱামাৰ কৈল গাঁৱৰ বাসিন্দা উমৰৰ ভনীয়েকে কয়- “যোৱা শুকুৰবাৰে তেওঁৰ লগত কথা পাতিছিলোঁ। তাৰ পিছত তেওঁ কৈছিল যে তেওঁৰ সন্মুখত পৰীক্ষা আছে, গতিকে তেওঁ লাইব্ৰেৰীত পঢ়ি আছে। তেওঁ কিতাপৰ পোক আছিল। ঘৰলৈ উভতি আহিলেও তেওঁ সকলোকে পঢ়িবলৈ কয়। সেই ল’ৰাটোৰ এনে কাৰ্য শুনি আমি স্তম্ভিত হৈ পৰিছোঁ।” উমৰৰ মাকে কঠোৰ পৰিশ্ৰম কৰি পৰিয়ালটোৰ দৰিদ্ৰতা দূৰ কৰিবলৈ চেষ্টা কৰিছিল বুলিও কয়।