দিল্লীৰ নিজামুদ্দিনৰ জংপুৰা ভোগল বজাৰ লেনত কালি গভীৰ নিশা পাৰ্কিং বিবাদৰ কাৰণে বলীউড অভিনেত্ৰী হুমা কুৰৈশীৰ ভাই আছিফ কুৰৈশীক হত্যা কৰা হৈছে। দুজন যুৱকে তীখাৰ অস্ত্ৰৰে আক্ৰমণ কৰি তেওঁৰ হত্যা কৰে।
ঘটনাৰ সৈতে জড়িত CCTV ফুটেজো পোহৰলৈ আহিছে। CCTV ফুটেজত স্পষ্টকৈ দেখা গৈছে যে কোনো কথাৰ ওপৰত তৰ্কৰ পিছত অভিযুক্ত দুজন ক্ষুব্ধ হৈ আছিফৰ ওপৰত আক্ৰমণ কৰে। এজন অভিযুক্তৰ হাতত তীখাৰ অস্ত্ৰ থাকে, যাৰে তেওঁ বাৰম্বাৰ আঘাত কৰে।
সূত্ৰৰ মতে, বিবাদৰ সূচনা হৈছিল যেতিয়া স্কুটীখন গেটৰ পৰা আঁতৰাই পাশত ৰখাৰ কথা কোৱা হৈছিল। সাধাৰণ যেন লগা এই বিবাদ অতি সোনকালেই হিংসাত্মক হৈ পৰে। ঘটনাত জড়িত মূল অভিযুক্ত গৌতম (১৮) আৰু উজ্জ্বল (১৯)এ একেলগে আছিফৰ ওপৰত আক্ৰমণ কৰে।
উজ্জ্বলে প্ৰথমে আঘাত কৰে, তাৰ পিছত গৌতমেও আক্ৰমণ কৰে। ঘটনাৰ সময়ত ঘটনাস্থলীত থকা লোকসকলে হস্তক্ষেপ কৰিবলৈ চেষ্টা কৰিছিল, এনেকি আছিফৰ পত্নীয়েও আক্ৰমণকাৰীসকলক ৰখাবলৈ চেষ্টা কৰিছিল, কিন্তু তাৰ ভিতৰত আছিফ গুৰুতৰভাৱে আহত হৈ পৰিছিল।
গুৰুতৰভাৱে আহত আছিফক ততাতৈয়াকৈ হাস্পতাললৈ নিয়া হৈছিল, কিন্তু চিকিৎসকে তেওঁক মৃত ঘোষণা কৰে। পুলিচে দুয়োজন অভিযুক্তৰ পৰিচয় নিৰ্ধাৰণ কৰিছে, যিসকল নিজৰ ভাই। অভিযুক্তক ধৰিবলৈ পুলিচে এটা দল গঠন কৰি অভিযান আৰম্ভ কৰিছে।
মৃতকৰ আত্মীয়ৰ মতে, এই হত্যা এটা পৰিকল্পিত ষড়যন্ত্ৰৰ ফল। আছিফৰ এজন আত্মীয় জাৱেদে কয় যে পূৰ্বে দুবাৰকৈ ইচ্ছাকৃতভাৱে তেওঁৰ সৈতে কাজিয়া কৰা হৈছিল আৰু তেওঁৰ ওপৰত আক্ৰমণ হৈছিল। তেওঁলোকৰ অভিযোগ যে এইবাৰ অভিযুক্তসকলে সুযোগ পাই তেওঁক হত্যা কৰিছে।
ঘটনাৰ সম্পূৰ্ণ বিবৰণ CCTVত বন্দী হৈছে, য’ত দুয়োজন অভিযুক্তক অস্ত্ৰৰ সৈতে আছিফৰ ওপৰত আক্ৰমণ কৰা স্পষ্টকৈ দেখা গৈছে। এই ফুটেজ পুলিচৰ তদন্তত গুৰুত্বপূৰ্ণ প্ৰমাণ হিচাপে কাম কৰিব পাৰে।
Niyomiya Barta Desk, 8 August, 2025