নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

‘শ্বিলং টাইমছ’ৰ সম্পাদক পেট্রিচিয়াৰ গোচৰ বন্ধ ছুপ্রিম ক’ৰ্টৰ

নিয়মীয়া বাৰ্তা ২৬ মাৰ্চঃ  ‘শ্বিলং টাইমছ’ৰ সম্পাদক পেট্রিচিয়া মুখিমৰ বিৰুদ্ধে অপৰাধ গোচৰ বন্ধ কৰাৰ সিদ্ধান্ত লৈছে উচ্চতম ন্যায়ালয়ে৷ ভাৰতীয় দণ্ডবিধিৰ বিভিন্ন ধাৰাৰ অধীনত মুখিমৰ বিৰুদ্ধে শীর্ষ আদালতখনত গোচৰ তৰিছিল মেঘালয়ৰ এখন গাঁৱৰ জনজাতীয় কমিটীয়ে৷ ‘দৰবাৰ স্নং’ হিচাপে জনা যায় জনজাতীয় গাঁৱৰ পৰিচালনা কমিটীক৷ ৪ জুলাইত ফেচবুক পোষ্টযোগে কৰা বিতর্কিত মন্তব্যৰ পিছতে সম্পাদকগৰাকীৰ বিৰুদ্ধে গোচৰ তৰা হৈছিল৷

উচ্চতম ন্যায়ালয়ৰ বিচাৰপতি এল এন ৰাও আৰু এছ ৰবিন্দ্র ভাটৰ বিচাৰপীঠে মুখিমৰ আবেদনৰ প্রতি ইতিবাচক সঁহাৰি দিছে৷ মুখিমে আবেদনখনত উল্লেখ কৰিছিল যে তেওঁৰ বিৰুদ্ধে চলাই থকা গোচৰ বন্ধ কৰিব লাগে৷ কাৰণ তেওঁৰ মতপ্রকাশৰ স্বাধীনতা আছে৷ ভাৰতীয় দণ্ডবিধিৰ ১৫৩(এ), ৫০০ আৰু ৫০৫ ধাৰাৰ অধীনত গোচৰ ৰুজু কৰা হৈছিল শ্বিলং টাইমছৰ সম্পাদকগৰাকীৰ বিৰুদ্ধে৷

স্মর্তব্য যে ফেচবুক পোষ্টত অজনজাতীয় যুৱক একাংশক আক্রমণ কৰা ঘটনাক গৰিহণা দিছিল পেট্রিচিয়া মুখিমে৷ অকল সেয়াই নহয়, এইক্ষেত্রত মেঘালয়ৰ মুখ্যমন্ত্রীৰ হস্তক্ষেপো দাবী কৰিছিল সাহসী সাংবাদিকগৰাকীয়ে৷

You might also like