- ডিব্ৰুগড়ত হঠাৎ আৰক্ষী সঞ্চালক প্ৰধান জি পি সিং!
- ডিজিপিৰ অধ্যক্ষতাত গুৰুত্বপূৰ্ণ নিৰাপত্তা পৰ্যালোচনা বৈঠক
নিয়মীয়া বাৰ্তা,১৫ মাৰ্চঃ আৰক্ষী সঞ্চালক প্ৰধান জি পি সিঙ আজি হঠাৎ ডিব্ৰুগড় উপস্থিত হয়।ডিব্ৰুগড়ত উপস্থিত হৈয়ে আৰক্ষীৰ নেগী গেষ্ট হাউচত ৰুদ্ধদ্বাৰ এখন নিৰাপত্তা পৰ্যালোচনা বৈঠকৰ অধ্যক্ষতা কৰি স্থলভাগত কাম কৰা সকলো সংস্থাৰ মাজত অধিক সহযোগিতা আৰু সমন্বয় বজাই ৰখাৰ ওপৰত গুৰুত্ব আৰোপ কৰে।ডিব্ৰুগড়ৰ আৰক্ষী অধীক্ষক শ্বেতাংগ মিশ্ৰ, আৰক্ষী অধীক্ষক তিনিচুকীয়াৰ অভিজিত গুৰাৱ,আৰক্ষী অধীক্ষক শদিয়াৰ পুষ্কিন জৈন, আৰক্ষী অধীক্ষক ধেমাজিৰ ৰঞ্জন ভূঞা,আৰক্ষী অধীক্ষক লখিমপুৰ বি এম ৰাজখোৱা, আৰক্ষী অধীক্ষক শিৱসাগৰ সুব্ৰজ্যোতি বৰা,আৰক্ষী অধীক্ষক চৰাইদেউৰ যুৱৰাজ, যোৰহাটৰ আৰক্ষী অধীক্ষক মোহন লাল মীনাৰ লগতে চি আৰ পি এফ, সেনা,দৌলত সিং নেগী সোঁৱৰণী আৰক্ষী অতিথিশালাত অনুষ্ঠিত হোৱা বৈঠকত অসম ৰাইফলছ, ভাৰতীয় বায়ুসেনা আৰু কেন্দ্ৰীয় চোৰাংচোৱা সংস্থা উপস্থিত থাকে।পুৱাৰে পৰা নিশালৈ অনুষ্ঠিত হোৱা বৈঠকত চোৰাংচোৱা সংগ্ৰহ,কাৰ্যকৰী তদন্ত, আইন-শৃংখলা আৰু ড্ৰাগছ বিৰোধী অভিযান, কাৰ্যকৰী প্ৰস্তুতি, অপৰাধৰ গোচৰ নিষ্পত্তি, তেল পাইপলাইন চুৰি, বাল্য বিবাহৰ বিৰুদ্ধে ব্যৱস্থা, ডিব্ৰুগড়ত আগন্তুক জি-২০ মিটৰ নিৰাপত্তাৰ ব্যৱস্থা আদি বিষয়সমূহৰ ভিতৰত আলোচনা কৰা হৈছিল।হাইস্কুল শিক্ষান্ত পৰীক্ষাৰ প্ৰশ্ন কাকত ফাদিল আৰু পৰৱৰ্তী সময়ত আৰক্ষীৰ কাৰ্যকলাপৰ বিষয়টোৱেও সভাত বিশেষভাবে স্থান লাভ কৰে।উত্তৰ-পূৱ পুলিচ ৰেঞ্জৰ অধীনলৈ অহা উচ্চ অসম জিলাসমূহৰ অপৰাধ পৰ্যালোচনা, বাল্যবিবাহৰ বিৰুদ্ধে ব্যৱস্থা গ্ৰহণ, সাধাৰণ সুৰক্ষা গ্ৰীড উন্নত কৰাৰ পদক্ষেপ, অপৰাধৰ গোচৰ নিষ্পত্তি, অপৰাধৰ বিচাৰ আৰু অপৰাধৰ দোষী সাব্যস্ত হোৱাৰ হাৰ বৃদ্ধিৰ উপায়ৰ বিষয়েও আলোচনা কৰা হয়।উচচ অসমত তেল পাইপলাইন চুৰি আৰু প্ৰতিৰোধমূলক ব্যৱস্থাৰ বিষয়েও বৈঠকত আলোচনা কৰা হয়।
কাইলৈ পুৱা সংবাদ মাধ্যমক সম্বোধন কৰিব অসম আৰক্ষীৰ সঞ্চালক প্ৰধান জি পি সিঙে।ইফালে আজি কোনো মন্ত্যব্য প্ৰকাশ কৰা নাই সংবাদ মাধ্যমত।
বৰ্তমানো ডিব্ৰুগড়ৰ দৌলত সিং নেগি আৰক্ষীৰ অতিথিশালাত উপস্থিত আছে অসম আৰক্ষীৰ শীৰ্ষ বিষয়া গৰাকী।উপস্থিত আছে উজনি অসমৰ কেইবাজনো আৰক্ষী অধীক্ষকৰ লগতে অনান্য আৰক্ষী বিষয়া সকল।নিশাৰ ভাগত বৈঠকত উপস্থিত হৈছে ডিব্ৰুগড় জিলা উপায়ুক্ত বিশ্বজিৎ পেগু।আজি নিশা আৰক্ষী সঞ্চালক প্ৰধান গৰাকী ডিব্রুগড়তে কটাব বুলি জানিব পৰা গৈছে।
ডিব্ৰুগড়ৰ পৰা বিভাস দুৱৰা।