নগাঁও জিলাৰ ধিঙত নিৰ্বাচনী আচৰণবিধি বলৱৎ হোৱাৰ মাজতে ফ্লায়িং স্কোৱাডে অভিযান চলাই বৃহৎ পৰিমাণৰ নগদ ধন জব্দ কৰিবলৈ সক্ষম হৈছে।
ধিং চাৰিআলিত চলোৱা এই অভিযানত ফ্লায়িং স্কোৱাডে মুঠ ১১ লাখ ২০ হাজাৰ টকা জব্দ কৰে। জানিব পৰা মতে, মৈৰাবাৰীৰ বৰথল দলৈগাঁৱৰ বাসিন্দা ফুৰকান আলীৰ পৰা এই নগদ ধনখিনি জব্দ কৰা হয়।
উল্লেখযোগ্য যে, নিৰ্বাচনৰ অধিসূচনা জাৰি হোৱাৰ পিছৰে পৰা প্ৰশাসনে কঠোৰ নজৰদাৰী আৰম্ভ কৰিছে। বিশেষকৈ ভোটাৰক প্ৰলোভন দেখুৱাই টকাৰ বিনিময়ত ভোট ক্ৰয় কৰাৰ চেষ্টা ৰোধ কৰাৰ উদ্দেশ্যে ফ্লায়িং স্কোৱাডে বিভিন্ন স্থানত নিয়মীয়াকৈ অভিযান চলাই আহিছে।
এই ঘটনাই নিৰ্বাচনৰ পূৰ্বে অবৈধ ধন সৰবৰাহ ৰোধত প্ৰশাসনৰ কঠোৰ পদক্ষেপক স্পষ্টকৈ প্ৰতিফলিত কৰিছে।
ডিজিটেল ডেস্ক, ২৭ মাৰ্চ