নিয়মীয়া বার্তা, ২৫ জানুৱাৰীঃ অষ্ট্রেলিয়াৰ বিৰুদ্ধে ঐতিহাসিক টেষ্ট শৃংখলাত সাহসী বেটিঙেৰে ক্রিকেটপ্রেমীৰ মন জয় কৰা পঞ্জাবৰ উদীয়মান তাৰকা শুভমন গিলে তেওঁৰ এই সাফল্যৰ বাবে যুৱৰাজ সিঙক ধন্যবাদ জনাইছে৷ আই পি এলৰ পূর্বে যুৱৰাজৰ সৈতে হোৱা এক প্রস্তুতি শিবিৰে তেওঁক যথেষ্ট সহায় কৰা বুলি ২১ বছৰীয়া অ’পেনাৰগৰাকীয়ে উল্লেখ কৰে৷
‘আই পি এলৰ পূর্বে মই যুৱৰাজৰ সৈতে এক শিবিৰত অংশ লৈছিলোঁ৷ এই শিবিৰত তেওঁ মোক বাউন্সাৰৰ সন্মুখীন হোৱাৰ বিভিন্ন কৌশল শিকাইছিল৷ বিভিন্ন দিশৰ পৰা যুৱৰাজে মোৰ শৰীৰলৈ শতাধিক ছর্ট পিটচ বল নিক্ষেপ কৰিছিল আৰু মই ইয়াৰ মোকাবিলা কৰিছিলোঁ৷ ইয়াৰ ফলত অষ্ট্রেলিয়াত মই মিচেল ষ্টার্কৰ দৰে আগশাৰীৰ বেগী বলাৰৰ বাউন্সাৰক দক্ষতাৰে খেলিব পাৰিছিলোঁ৷’ গিলে এইদৰে কয়৷
ইফালে, ব্রিছবেন টেষ্টৰ অন্তিম দিনা ৯১ ৰানৰ আকর্ষণীয় ইনিংছেৰে ভাৰতৰ স্মৰণীয় জয়ৰ ভেটি গঢ়া উদীয়মান তাৰকাগৰাকীয়ে কয় যে এইবাৰ তেওঁ ইংলেণ্ডৰ বিৰুদ্ধে যুঁজ দিবলৈ সাজু হৈছে৷ জেমছ এণ্ডাৰছন, ষ্টুৱার্ট ব্রড, জ’ফ্রা আর্চাৰৰ দৰে দুর্ধর্ষ বেগী বলাৰৰ সন্মুখীন হোৱাটো প্রত্যাহ্বানজনক হ’ব বুলি গিলে উল্লেখ কৰে৷